Qidaların düzgün birləşdirilməsi sağlam qidalanma və həzm prosesi üçün vacibdir. Bəzi qidaları birlikdə istehlak etmək mədə-bağırsaq sistemində narahatlıqlara, həzmsizlik və ya qida maddələrinin düzgün sorulmamasına səbəb ola bilər. Buna görə də, müəyyən qidaların birgə qəbulundan çəkinmək məsləhətdir.
Foodinfo.az xəbər verir ki, süd ilə portağal, limon kimi sitrus meyvələrinin birgə qəbul edilməsi mədə turşuluğunu artıraraq həzm problemlərinə səbəb ola bilər. Sitrus meyvələri ilə südün tərkibindəki proteinlər arasında reaksiya baş verə və bu da mədədə narahatlıq, şişkinlik və həzmsizlik yarada bilər.
Qırmızı ət (mal əti, quzu əti) və kartof, düyü, çörək kimi nişastalı qidaların birgə qəbulu mədədə həzm prosesini yavaşlada bilər. Nişasta və zülalların birlikdə həzmi mədə turşusunun çoxalmasına səbəb olur və nəticədə həzmsizlik və şişkinlik yaranır.
Meyvələr sürətlə həzm olunan qidalardır və onları yeməklərdən sonra istehlak etmək həzmi ləngidə bilər. Meyvələr mədədə daha tez həzm olunur və qısa müddətdə bağırsaqlara keçir. Lakin ağır yeməklərlə birlikdə qəbul edildikdə onların mədədə qalma müddətini uzadır, bu da fermentasiya və qaz yaranmasına səbəb olur. Meyvələri əsas yeməklərdən ayrı, tercihen yeməklərdən 30 dəqiqə əvvəl və ya 2 saat sonra istehlak etmək daha faydalıdır.
Pomidor turşuluğa malik bir tərəvəzdir və onu nişastalı düyü ilə birlikdə yemək mədə turşuluğunu artıra bilər. Bu kombinasiya həzm prosesini çətinləşdirə və mədə qıcqırmasına səbəb ola bilər.
Spirtli içkilərlə kofeinli içkilərin (qəhvə, çay, kola) birgə qəbulu bədənin su balansını pozur və böyrəklərə əlavə yük gətirir. Hər iki içki də dehidratasiya (susuzlaşma) riskini artırır, buna görə də bu qidaların birgə qəbulu məsləhət görülmür.
Paxlalılar (noxud, lobya, mərci) və süd məhsullarının birgə istifadəsi həzmi çətinləşdirə bilər. Paxlalılar mədədə qaz yaranmasına meyilli olan qidalardır və süd məhsulları ilə birlikdə istehlak edildikdə bu problem daha da güclənə bilər.
Yemək seçimlərində bu qaydalara riayət etmək ümumi sağlamlığı qorumağa və həzm sisteminin işini optimallaşdırmağa kömək edir.
