Ağ gilas mürəbbəsi həm ləzzətli, həm də göz oxşayan bir qış tədarüküdür. Onun hazırlanması nisbətən sadədir və təbii dadını qoruyub saxlayır.
Foodinfo.az ağ gilasın hazırlanma qaydasını təqdim edir:
Lazım Olan Ərzaqlar
- 1 kq ağ gilas
- 1,2 kq şəkər
- 1/2 stəkan su
- 1 ədəd limonun suyu
Hazırlanma Qaydası
1. İlk öncə ağ gilasları təmizləyin, saplarını ayırın və çəyirdəklərini çıxarın. Gilasların bütöv qalmasına diqqət edin ki, mürəbbə bişdikdən sonra gözəl görünsün.
2. Böyük bir qazana şəkəri və suyu əlavə edin. Şəkər əriyənə qədər orta istilikdə qarışdırın və şərbət hazırlayın.
3. Hazır şərbətə təmizlənmiş gilasları əlavə edin və qarışdırın. Qarışımı orta istilikdə qaynamağa qoyun. Gərəkli hallarda mürəbbənin üzərinə çıxan köpüyü yığın.
4. Təxminən 20-25 dəqiqə sonra mürəbbənin içinə limon suyunu əlavə edin. Limon suyu həm mürəbbənin uzun müddət təravətini qoruyacaq, həm də gilasa gözəl parıltı verəcək.
5. Gilaslar şərbətin içində şəffaflaşdıqda və mürəbbə qatılaşdıqda proses başa çatmışdır.
6. Hazır mürəbbəni sterilizasiya edilmiş bankalara tökün və qapaqlarını möhkəm bağlayın. Bankaları tərsinə çevirərək soyudun. Mürəbbə tam soyuduqdan sonra qaranlıq və sərin yerdə saxlayın.
Bu üsulla hazırladığınız ağ gilas mürəbbəsi uzun müddət saxlanılaraq qış aylarında süfrənizə təbii dad və qoxu gətirəcək.
