Effektiv və sağlam çəki itirmək yalnız qida rejiminin dəyişdirilməsi ilə mümkün deyil. Foodinfo.az xəbər verir ki, dietoloq Larisa Nikitina arıqlama prosesində kompleks yanaşmanın vacibliyini vurğulayıb.

Mütəxəssisin sözlərinə görə, ilk növbədə “sürətli karbohidratlar” rasiondan çıxarılmalıdır. Bu yalnız şəkər, şirniyyat, tort, konfet və un məmulatları ilə məhdudlaşmır. Onun sözlərinə görə, bəzi kök və nişastalı tərəvəzlər – yerkökü, çuğundur, kartof da gündəlik miqdarda azaldılmalıdır.

Nikitinaya görə, düzgün arıqlamaq üçün fiziki aktivlik də vacibdir. Həftədə müntəzəm məşqlər və açıq havada gəzintilər bədən metabolizmini sürətləndirir və artıq kalorilərin yandırılmasına kömək edir.

Ekspert həmçinin yuxu rejiminə diqqət yetirməyin əhəmiyyətini qeyd edib. Gec saatlara qədər yatmamaq, 23:00-dan əvvəl yatmaq melatonin və böyümə hormonunun düzgün ifrazına imkan verir ki, bu da artıq çəkinin toplanmasının qarşısını alır.

“Nəhayət, əhval-ruhiyyə də vacibdir. Xoşbəxt və razı olan insan daha az yeyir, stress və emosional aclıq səbəbilə şirniyyat və digər yüksək kalorili məhsullara üz tutmur”, – deyə Nikitina əlavə edib.

Həkim vurğulayır ki, kompleks yanaşma – düzgün qida, fiziki aktivlik, yuxu və psixoloji balans – arıqlama prosesini daha davamlı və sağlam edir.