Yay mövsümündə dondurma seçərkən diqqətli olmaq lazımdır. Foodinfo.az bildirir ki, bu barədə diyetoloq Yelena Solomatina Sputnik Radiosuna müsahibəsində danışıb. Onun sözlərinə görə, əsl və sağlam dondurmanın tərkibində yalnız süd, qaymaq, şəkər, bəzən isə kakao və qoz-fındıq olmalıdır.

Mütəxəssis vurğulayıb ki, orijinal dondurmanın tərkibində süd yağını əvəz edən sintetik maddələr, dadlandırıcılar və süni rəngləndiricilər yer almamalıdır. Belə məhsulların istehlakı sağlamlığa zərər verə və allergik reaksiyalara səbəb ola bilər.

Solomatina əlavə edib ki, dondurma seçərkən onun görünüşünə də xüsusi diqqət yetirmək lazımdır. Məhsulun üzərində əzilmə və ya rəng zolaqları olmamalıdır, çünki bu, onun düzgün saxlanmadığından xəbər verir.

Həkim xəbərdarlıq edib ki, hətta qismən defrost zamanı belə dondurmanın tərkibində patogen mikroorqanizmlər sürətlə çoxala bilər. Bu isə sağlamlıq üçün ciddi risk yaradır.

Diyetoloq bildirib ki, xüsusilə uşaqlar və həssas qruplar üçün təbii tərkibli və istehsal tarixi yeni olan dondurmalar seçilməlidir. O, qeyd edib ki, belə məhsullar həm dadlı, həm də sağlamlıq üçün təhlükəsiz seçimdir.