Sızanaqların yaranmasında tez-tez günahlandırılan şokoladın bu problemə təsiri ilə bağlı müzakirələr hələ də davam edir. Şokoladın özü deyil, onun tərkibi və qəbul miqdarı daha böyük rol oynayır.

Foodinfo.az xəbər verir ki, saf kakao tərkibli tünd şokoladın sızanaqlara birbaşa səbəb olduğu tam sübut olunmayıb. Əksinə, kakao antioksidantlarla zəngin olduğu üçün müəyyən hallarda dəriyə faydalı təsir göstərir.

Lakin mütəxəssislər qeyd edir ki, problem əsasən şəkər və yağ tərkibi yüksək olan südlü və emal olunmuş şokoladlarda olur. Bu tip məhsullar qanda şəkərin səviyyəsini sürətlə artıraraq hormon balansına təsir edə və nəticədə sızanaqların yaranmasını təşviq edə bilər.

Bəzi insanlarda isə şokolad fərdi həssaslıq səbəbilə dəri problemlərini artırır. Bu, hər kəsdə eyni şəkildə müşahidə olunmur və fərdi xüsusiyyətlərdən asılıdır.

Şokoladı tamamilə rasiondan çıxarmağa ehtiyac yoxdur. Əsas məsələ onun növünü düzgün seçmək və miqdarını nəzarətdə saxlamaqdır. Tünd şokoladın ölçülü qəbulu, balanslı qidalanma və düzgün dəriyə qulluq sızanaqların qarşısını almaqda daha effektiv yanaşma hesab olunur.