Yay mövsümü başa çatmaq üzrədir və təbiətin ən bol hədiyyələri süfrələrimizi bəzəməkdə davam edir. Foodinfo.az xəbər verir ki, tanınmış aqronom və bağban Oktabrina Qaniçkina “Vechernyaya Moskva”ya açıqlamasında avqustun sonunun pomidor, xiyar, balqabaq və patissonların konservasiyası üçün ən uyğun dövr olduğunu bildirib.

Mütəxəssis qeyd edib ki, duzlu balqabaqların dadı bir çox hallarda marinad edilmiş xiyarlardan belə daha üstün olur. Onun fikrincə, məhz indi bağdan yığılmış tərəvəzlər təbii dadını itirmədən qış ehtiyatına çevrilməlidir.

Qaniçkinanın sözlərinə görə, avqust sonu həm də giləmeyvələrdən – qarağat və moruqdan mürəbbə və cem hazırlamaq üçün ideal vaxtdır. Bu məhsullar yalnız dadlı qış təamı deyil, həm də immun sistemini gücləndirən vitamin mənbəyi kimi xüsusi əhəmiyyət daşıyır.

Ekspert əlavə edib ki, hazırlanan konservlərlə yanaşı, təzə tərəvəzlərin düzgün saxlanılması da vacibdir. O, qışa qədər tərəvəzləri saxlamaq istəyənlərə kartof, kök və çuğunduru kağız torbalarda balkonda qorumağı tövsiyə edib.

“Belə şəraitdə tərəvəzlər təzəliyini itirmir və dekabr ayına qədər rahatlıqla istifadə edilə bilər”, — deyə Qaniçkina vurğulayıb.