Uşağın sağlamlığı və inkişafı çox vaxt düzgün qidalanmadan asılıdır, çünki qida orqanizmə enerji verir, immun sistemini gücləndirir və beyin funksiyalarının inkişafına dəstək olur.
Foodinfo.az xəbər verir ki, nutrioloq Eva Şişova uşaqlar üçün ən faydalı məhsullardan birinin balıq olduğunu bildirib. Ekspert qeyd edir ki, balıq asan həzm olunan zülal, B qrupu vitaminləri, fosfor, yod və omeqa-3 yağ turşuları ilə zəngindir və bu maddələr həm immunitetin möhkəmlənməsinə, həm də sinir sistemi və sümük-diş sağlamlığının qorunmasına kömək edir.

Şişova xüsusilə yaddaş və diqqətin inkişafı baxımından bəzi balıq növlərini tövsiyə edir. Onun sözlərinə görə, uşaqlar üçün ən faydalı balıqlar arasında skumbriya, qızılbalıq (qorbuşa), şprot, tuna və mintey önə çıxır. Skumbriya omeqa-3 və D vitamini ilə zəngindir, qorbuşa balanslı qida mənbəyidir, şprot isə A, E, D vitaminləri və faydalı yağ turşularını ehtiva edir. Tuna isə xüsusilə uşaqlar üçün əvəzsizdir: yüksək zülal, selen, natrium, kalium və omeqa-3 yağ turşuları ilə zəngin olduğu üçün beyin hüceyrələrinin formalaşmasına, yaddaşın yaxşılaşmasına və iltihabların qarşısının alınmasına yardım edir.

Ekspert uşaqlara balığı zorla yedirtməməyi, əksinə maraqlandıraraq rasiona daxil etməyi tövsiyə edir. Şişova bunun üçün bir neçə üsul təklif edir: balığı həftədə bir dəfə rasiona əlavə edib tədricən tezliyi artırmaq; uşağın dadına uyğun neytral balıq növlərini seçmək; balığı tanış yeməklərə qarışdırmaq — məsələn, kotlet, burger və ya piroqda; həmçinin, uşağın sevimli cizgi filmləri, kitab və ya film obrazlarına uyğun yeməklər hazırlamaq; və uşağın fikrini öyrənərək yeməyi onunla birlikdə tədricən formalaşdırmaq.

Şişova vurğulayır ki, bu yanaşma uşaqlarda həm balığa maraq oyadır, həm də onların sağlam qidalanma vərdişlərini uzun müddət qorumağa imkan verir.