Pəhriz seçərkən və arıqlamağa çalışarkən insanların çoxu ilk növbədə un məmulatları, yağlı qidalar və bəzi içkilərdən imtina edir. Lakin son illərdə aparılan araşdırmalar göstərir ki, əvvəllər zərərli hesab olunan bir sıra məhsullar əslində düzgün və ölçülü istifadə edildikdə orqanizm üçün faydalı ola bilər. Foodinfo.az BB.LV saytına istinadla xəbər verir ki, mütəxəssislər bu baxımdan xüsusilə yeddi məhsulun adını çəkir və onların qida rasionunda tamamilə kənarlaşdırılmasının doğru olmadığını bildirirlər.
Bu siyahıda ilk yerlərdən birini makaron tutur. Xüsusilə ağ un və marqarinlə hazırlanan kökə və şirniyyatlar zərərli hesab edilsə də, bərk buğda sortlarından hazırlanan makaron və tam taxıllı çörək orqanizm üçün faydalıdır. Tam dənli undan hazırlanan məhsullar lif və B qrup vitaminləri ilə zəngin olur, “yavaş” karbohidratlar sayəsində isə qan şəkərini kəskin yüksəltmir. London Universitetinin araşdırmasına görə, bu cür məhsullar bel nahiyəsində yağ yığılmasının qarşısını ala bilər.
İkinci maraqlı məhsul yağlı pendir və süddür. Uzun müddət bu məhsullar xolesterini artırdığı üçün tənqid edilsə də, ürək-damar problemi olmayan insanlar üçün onların faydalı olduğu bildirilir. Yağlı süd məhsulları kalsium və B vitaminlərinin daha yaxşı mənimsənilməsinə kömək edir. Alimlər həmçinin süddə olan və KKL adlanan maddənin yağ yığılmasına mane ola biləcəyini də müəyyən ediblər.
Kartof da illərlə artıq çəkinin əsas səbəblərindən biri kimi təqdim olunub. Lakin dietoloqlar bildirirlər ki, təzə kartof düzgün bişirildikdə və ölçülü yeyildikdə təhlükəli deyil. Onun tərkibindəki nişasta orqanizmdə tədricən parçalanır, uzunmüddətli toxluq hissi yaradır və artıq kalori qəbulunun qarşısını alır. Üstəlik, kartofun 100 qramı cəmi 80 kilokalori təşkil edir.
Şokolad da zərərli imicinə baxmayaraq faydalı tərəflərə malikdir. Xüsusilə tərkibində kakao miqdarı yüksək olan tünd şokolad antioksidantlarla zəngindir, sinir sistemini sakitləşdirir və əhval-ruhiyyəni yaxşılaşdırır. Kopenhagen Universitetinin alimləri tünd şokoladın iştahanı azaltdığını və daha az yeməyə kömək etdiyini bildirirlər.
Qəhvə isə düzgün istifadə edildikdə sağlamlığa zərər deyil, əksinə fayda verə bilər. Gün ərzində 3–4 fincandan artıq olmayan qəhvə yaddaşı və diqqəti gücləndirir, maddələr mübadiləsini sürətləndirir və ürək-damar sistemini qoruyur. Lakin şəkərsiz və südsüz qara qəhvəyə üstünlük verilməlidir.
Siyahının sonuncu maraqlı məhsulu popkorndur. Kinozallarda satılan yağlı və şirin popkorndan fərqli olaraq, ev şəraitində hazırlanan sadə popkorn liflə zəngindir və həzm sisteminə müsbət təsir göstərir. Amerika Səhiyyə Assosiasiyasının məlumatına görə, popkorn sevənlər mədə-bağırsaq xəstəliklərindən daha az əziyyət çəkirlər.
Mütəxəssislər vurğulayırlar ki, bu məhsulların faydalı olması yalnız normaya riayət edildikdə mümkündür. Hər bir qida düzgün seçildikdə və balanslı rasionun tərkib hissəsi olduqda sağlamlığa töhfə verə bilər.
