Antibiotik qəbul edən zaman bəzi qidalarla birgə istifadə ciddi fəsadlara və müalicənin təsirinin azalmasına səbəb ola bilər. Foodinfo.az Aif.ru-ya istinadla xəbər verir ki, klinik dərman bilicisi Yuliya Prostakişina antibiotiklərlə qəti uyğunsuz olan qida növlərini sadalayıb.
Mütəxəssis bildirir ki, antibiotiklərin bədən tərəfindən qəbul edilməsi bir çox amildən asılıdır və gündəlik yeyilən qidalar onların təsirini gücləndirə və ya tamamilə zəiflədə bilər. Xüsusilə kalsium, dəmir və bəzi meyvə şirələrinin tərkibində olan təbii maddələr dərmanın sorulmasını əngəlləyir. Bu isə həm müalicə müddətini uzadır, həm də əlavə narahatlıq yarada bilər.
Həkim ilk olaraq süd və südlü qidaları antibiotiklərlə birlikdə qəbul etməyi yasaq edir. Çünki südün tərkibindəki kalsium tetrasiklin və ftorxinolon qrupuna aid dərmanların bədənə sorulmasını azaldır. Nəticədə dərman öz təsirini tam göstərə bilmir və müalicə zəifləyir.
Eyni zamanda, dəmir baxımından zəngin olan qidalar da antibiotiklərin təsirinə mane olur. Qırmızı ət, qaraciyər, ispanaq və nar kimi qidaların penisillin və sefalosporin qrupuna aid dərmanların bədənə daxil olmasını çətinləşdirdiyi qeyd edilir. Bu isə xəstəliyin sağalma müddətini uzada bilər.
Alimlər xəbərdarlıq edir ki, sitrus meyvələrinin şirələri də diqqətlə istifadə olunmalıdır. Xüsusilə greyfurt şirəsi makrolid qrupuna aid dərmanların bədəndə parçalanma sürətini yavaşıdır. Bu hal dərmanın bədəndə normadan artıq qalmasına və narahat nəticələr yaratmasına səbəb ola bilər.
Antibiotiklərlə birlikdə qəbul edilməməli olan ən təhlükəli maddələrdən biri də içki sayılır. İçkidəki etanol çoxlu dərman qrupları ilə təmasda olduqda həm onların faydasını azaldır, həm də zəhərlənmə riskini artırır. Bu səbəbdən həkimlər antibiotik qəbul edənlərin tamamilə içkidən uzaq durmasını tövsiyə edirlər.
