Yay mövsümünün isti günlərində isti şorba yerinə sərin və yüngül yeməklərə üstünlük verilir. Foodinfo.az xəbər verir ki, qidalanma ekspertləri qeyd edir ki, soyuq şorbalar yalnız Cənub ölkələrinin mətbəxində deyil, həmçinin soyuq iqlim şəraitində yaşayan xalqlarda da geniş yayılıb və faydalı qida mənbəyi sayılır.

Mütəxəssislərin tövsiyəsinə görə, İspaniyanın məşhur qarpacho şorbası tərəvəz və zeytun yağı ilə zəngin olub, tərkibində lif və antioksidantlar var. Litvanın “şalti barşçay” adlı soyuq borşu isə tan, smetan və kefir ilə hazırlanır, bu da bağırsaq mikroflorasını dəstəkləyir və probiotik xüsusiyyət daşıyır. Koreyada “nənmyon” adlanan soyuq şorba isə tərəvəz, yumurta, bişmiş ət və soya sousu ilə hazırlanır, həm də zülal və vitaminlərlə zəngindir.

Estoniyada soyuq şorba əsasən süd və ya ayran əsaslı olur, içərisinə bişmiş kartof, çuğundur, yerkökü, xiyar və yaşıl noxud əlavə edilir. Bu şorba həm doyurucu, həm də bağırsaq sağlamlığı üçün faydalıdır. Peruda isə ən orijinal soyuq şorba “seviçə”dir. Burada balıq, toyuq və ya dəniz məhsulları limon və portağal şirəsində hazırlanır ki, bu da C vitamini və zülal ilə zəngin qida təmin edir.

Qida ekspertləri bildirir ki, soyuq şorbalar yay aylarında həm orqanizmi sərinlədir, həm də vitamin və minerallarla zəngin qida qəbulunu təmin edir. Həmçinin, müxtəlif tərəvəz və protein mənbələrinin kombinasiyası, qan şəkərinin sabit qalmasına və enerji səviyyəsinin qorunmasına kömək edir. Bu səbəbdən dietoloqlar tövsiyə edir ki, insanlar isti havalarda tez-tez bu tip şorbaları menyularına daxil etsinlər.