Səhərlər acqarına kofe içmək vərdişi bir çox insanda enerjini artırsa da, bəzi hallarda bu vərdiş əks təsirlər yarada bilər. Foodinfo.az bildirir ki, İngiltərənin Nottingem Universitetinin mütəxəssisi doktor Eliza Murphy səhər enerjisini təmin etmək üçün kofeyə alternativ olaraq təbii çuğundur suyunu tövsiyə edir.

Onun sözlərinə görə, çuğundur suyu bədəndəki qan dövranını stimullaşdırır, beyin fəaliyyətini artırır və təbii antioksidantlarla orqanizmi qoruyur. Səhər saatlarında kofe qəbulu bəzi insanlarda qanda kortizol səviyyəsini yüksəldərək, gün ərzində əsəbilik və ürəkdöyünmə hallarına səbəb ola bilər. Çuğundur isə bu təsirləri yaratmadan enerjini bərpa edir.

Araşdırmalara əsasən, çuğundur suyu içənlərdə idrak funksiyaları və diqqət səviyyəsi daha yüksək olur. Həkim Murphy onu da bildirir ki, çuğundur suyu təkcə enerji deyil, eyni zamanda qaraciyər və böyrək fəaliyyətini də dəstəkləyir.

Bununla belə, onun tərkibində olan nitratlar bəzi insanlarda təzyiqin enməsinə səbəb ola bilər, buna görə də istifadədə ehtiyatlı olmaq tövsiyə olunur. Xüsusilə səhər idman edənlər üçün bu içki ideal sayılır. Çuğundur suyunu alma suyu və ya zəncəfillə qarışdıraraq daha dadlı və faydalı etmək olar.