Şef-aşpaz Maksim Tarusin dadlı və şirəli kabab hazırlamaq üçün əsas qaydaları açıqlayıb. Onun sözlərinə görə, düzgün seçilmiş ət, marinad və bişirmə üsulu kababın dadına birbaşa təsir edir.

Foodinfo.az BB.LV saytına istinadla xəbər verir ki, aşpaz kabab üçün ət tikələrinin çox xırda doğranmamasını tövsiyə edir. Mütəxəssisin sözlərinə görə, ideal ölçü təxminən 5-6 santimetr hesab olunur. Bu zaman ət həm yaxşı bişir, həm də şirəli qalır.

Şef bildirib ki, kabab üçün mal əti, quzu əti, donuz əti, toyuq və hətta balıqdan istifadə etmək mümkündür. Toyuq filesinin quru alınmaması üçün onu bekona və ya quyruq yağına bükmək məsləhət görülür. Balıq kababı üçün isə nərə, forel və tuna uyğun hesab olunur.

Maksim Tarusin qeyd edib ki, ətin marinadı üçün müxtəlif məhsullardan istifadə etmək olar. Kefir, qatıq, xama, mayonez, soya sousu və hətta qazlı içkilər marinad üçün yararlı sayılır. Lakin şəkərli içkilərin kababın tez yanmasına səbəb ola biləcəyi vurğulanıb.

Aşpazın sözlərinə görə, kabab bişirilərkən ən böyük səhvlərdən biri ətin közə çox yaxın və ya çox uzaq yerləşdirilməsidir. Optimal məsafə təxminən 10-12 santimetr hesab olunur. Bu halda ətin səthi tez qızarır və iç hissəsi şirəli qalır.

Şef həmçinin kabab üçün ağcaqayın kömürünün daha uyğun olduğunu bildirib. Ətir vermək üçün közə albalı yonqarı, dəfnə yarpağı və ya qara istiot əlavə etməyin mümkün olduğu qeyd olunub.

Mütəxəssis sousun da marinada uyğun hazırlanmasını tövsiyə edir. Onun sözlərinə görə, mayonezlə marinad edilmiş ət üçün mayonez əsaslı, qatıqla marinad edilmiş kabab üçün isə sarımsaq və göyərtili sous daha uyğun hesab olunur.