Qızartmadan tam imtina etmək çətin olsa da, düzgün yağ seçimi ilə onun zərərini azaltmaq mümkündür. Mütəxəssislər bildirir ki, əsas problem yüksək temperaturda yağların parçalanaraq zərərli maddələr — kanserogen birləşmələr əmələ gətirməsidir. Foodinfo.az aif.ru saytına istinadla xəbər verir ki, dietoloq qızartma üçün uyğun yağların xüsusiyyətlərini açıqlayıb.

Ekspertin sözlərinə görə, qızartma üçün yağ seçərkən iki əsas meyara diqqət yetirilməlidir: yüksək tüstülənmə temperaturu və rafinasiya olunmuş olması. Bu xüsusiyyətlər yağın yüksək istilikdə daha stabil qalmasına və zərərli maddələrin daha az yaranmasına kömək edir. Ən yaxşı alternativ üsullar isə sobada bişirmə, qaynatma və ya buxarda hazırlamadır.

Qızartma üçün uyğun hesab olunan yağlara rafinə olunmuş zeytun yağı (xüsusilə “extra virgin” deyil), yüksək olein tərkibli günəbaxan yağı, həmçinin kokos, yerfıstığı və palma yağları daxildir. Kərə yağı, ghi və piy texniki olaraq yüksək temperaturda istifadə oluna bilsə də, tərkibində doymuş yağların çox olması səbəbindən onların tez-tez istifadəsi tövsiyə edilmir.