Bədən qoxusunun yaranması yalnız gigiyena ilə bağlı deyil, gündəlik qidalanma da bu prosesə ciddi təsir göstərir. Bəzi qidalar həzm olunduqdan sonra tər və dəri vasitəsilə xaric olan maddələrin tərkibini dəyişdirərək qoxunun daha kəskin və ya fərqli olmasına səbəb ola bilər.
Foodinfo.az xəbər verir ki, sarımsaq və soğan kimi kəskin qoxulu tərəvəzlər tərkibindəki kükürd birləşmələri səbəbilə bədən qoxusunu gücləndirir. Bu maddələr qana keçərək tər vasitəsilə xaric olunur və özünəməxsus qoxu yaradır.
Qırmızı ətin tez-tez və çox miqdarda qəbulu da bədən qoxusuna təsir göstərir. Onun həzmi daha uzun çəkdiyi üçün parçalanma zamanı yaranan bəzi maddələr dəridən ifraz olunaraq qoxunun dəyişməsinə səbəb olur.
Bundan əlavə, qəhvə və digər kofeinli içkilər tər vəzilərini aktivləşdirərək tərləməni artırır. Bu da dolayısı ilə bədən qoxusunun daha güclü hiss olunmasına gətirib çıxarır.
Acılı qidalar da eyni şəkildə bədən temperaturunu yüksəldir və tərləməni artırır. Nəticədə qoxu daha tez yaranır və daha intensiv hiss olunur. Hətta bəzi sağlam tərəvəzlər, məsələn brokoli və kələm də tərkibindəki kükürd səbəbilə bədən qoxusuna təsir göstərə bilər.
Bu qidalar sağlamlıq üçün faydalı olsa da, onların həddindən artıq qəbulu bədən qoxusunu dəyişir. Balanslı qidalanma, kifayət qədər su içmək və düzgün gigiyena qaydalarına əməl etmək bu təsiri minimuma endirməyə kömək edir.
