Son illərdə bəzi insanlarda qlüten qəbul etdikdən sonra müxtəlif həzm və ümumi sağlamlıq problemlərinin ortaya çıxdığı müşahidə olunur. Bu vəziyyət qeyri‑çölyak qlüten həssaslığı adlandırılır.Bu hal, Çölyak xəstəliyi və ya qlüten allergiyası olmadan qlütenə qarşı həssaslıqla xarakterizə olunur.
Foodinfo.az xəbər verir ki, bu vəziyyətdə insanlar qlüten tərkibli qidalar qəbul etdikdən sonra qarın ağrısı, şişkinlik, qaz, yorğunluq və baş ağrısı kimi simptomlar hiss edə bilərlər. Bəzi hallarda diqqət dağınıqlığı və ümumi halsızlıq da müşahidə oluna bilər.
Qlüten əsasən buğda, arpa və çovdar kimi taxıllarda olur. Qeyri-çölyak qlüten həssaslığı olan insanlarda qlüten qəbul edildikdən sonra narahatlıq yaransa da, çölyak xəstəliyində olduğu kimi bağırsaqlarda ciddi zədələnmə baş vermir.
Diaqnoz adətən digər xəstəliklər istisna edildikdən sonra qoyulur. Bunun üçün əvvəlcə çölyak xəstəliyi və qida allergiyaları yoxlanılır, daha sonra qlütenli qidalar azaldılaraq simptomların dəyişməsi izlənilir.
Bu vəziyyəti yaşayan insanlar qlüten tərkibli qidaları məhdudlaşdırmaqla və balanslı qidalanmaya diqqət etməklə simptomları nəzarətdə saxlaya bilərlər. Bununla belə, pəhriz dəyişiklikləri etməzdən əvvəl mütəxəssis məsləhəti almaq tövsiyə olunur.
