Qadınlarda üst dodaq nahiyəsində sərt və tünd tüklərin əmələ gəlməsi, başqa sözlə, hirsutizm adlanan halın ən yayılmış səbəbi bədəndə hormonal tarazlığın pozulmasıdır. Foodinfo.az Gazeta.ru-ya istinadla xəbər verir ki, ginekoloq-endokrinoloq Olqa Bratçikova bu problemin əsas mexanizmini izah edib.

Həkimin sözlərinə görə, yanlış qidalanma və az hərəkətlilik bir-birinə bağlı dəyişikliklər zənciri yaradır. Sürətli udulan un məmulatları, şirin içkilər, tez bişən yeməklər və yüksək kalorili qidalar hüceyrələrin insulini qəbul etməsini çətinləşdirir. Bu hal insulinə qarşı dözümsüzlük adlanır və mədəaltı vəzin daha çox insulin ifraz etməsinə səbəb olur.

İnsulinin normadan artıq yüksəlməsi isə yumurtalıqlarda kişi hormonu olan testosteronun həddindən artıq yaranmasına yol açır. Testosteron qadınlarda üst dodaq, çənə, döş və qarın bölgəsində sərt, tünd tüklərin artmasına səbəb olur. Mütəxəssis bu prosesin qadınlarda üz tüklənməsinin ən geniş yayılmış mexanizmi olduğunu bildirir.

Həkim əlavə edir ki, artıq çəki və insulinə qarşı dözümsüzlük əsas səbəb sayılsa da, digər amillər də diqqətdən kənarda qalmamalıdır. Yumurtalıqların çoxsaylı kistlərlə müşayiət olunduğu polikistoz sindromu, eləcə də böyrəküstü vəzin bəzi nadir fəaliyyət pozuntuları da bədəndə kişi hormonlarının artmasına gətirib çıxara bilər.

Bu vəziyyət hirsutizmlə yanaşı aybaşı nizamsızlığı, üzdə sızanaqlar və hormonal pozuntularla özünü göstərə bilər. Mütəxəssislər belə hallarda vaxtında həkimə müraciət etməyin vacib olduğunu vurğulayırlar.

Qadınlarda bu tip narahatlıq yarandıqda endokrinoloq və ya ginekoloq-endokrinoloq tərəfindən müayinə tövsiyə olunur. Adətən hormon səviyyələrinin, qanda şəkərin, qlobulinlərin və digər göstəricilərin analizi aparılır. Dəqiq diaqnoz problemin mənbəyini müəyyən etməyə və uyğun müalicə planı qurmağa şərait yaradır.

Mütəxəssislər xəbərdarlıq edirlər ki, düzgün qidalanma, hərəkətli həyat tərzi və vaxtında tibbi nəzarət hormonal tarazlığın qorunmasına və hirsutizmin qarşısının alınmasına mühüm şəkildə kömək edir.