Qranadilla və marakuya adları çox vaxt bir-biri ilə qarışdırılır, lakin bu iki tropik meyvə arasında həm dad, həm quruluş, həm də tərkib baxımından mühüm fərqlər mövcuddur.
Foodinfo.az xəbər verir ki, qranadilla (Passiflora ligularis) – “qızılı marakuya” və ya “şirin nar” kimi tanınan ekzotik meyvədir. O, marakuya kimi passiflora (granatçiçək) fəsiləsinə aiddir, lakin dadı və tərkibi bir qədər fərqlənir.
Mənşə və xarakterik xüsusiyyətlər
Qranadilla əsasən Cənubi Amerikanın And dağlarının yamaclarında – Kolumbiya, Ekvador, Peru və Braziliyada yetişir. Onun qalın, lakin kövrək sarı-narıncı qabığı, içərisində isə çoxsaylı xırda qara tumları olan şirin, ətirli və jel şəklində içliyi olur. Dadı şirin qovun, kivi və qreypfrut qarışığını xatırladır.
Marakuya isə daha turş dadlı olur, qabığı tünd bənövşəyi və ya sarı rəngdədir, içliyi isə daha ətirli, lakin turşməzə olur. Buna görə qranadilla daha çox şirin və yumşaq dad sevənlər üçün uyğundur.
Qidalanma və faydaları
Qranadilla C vitamini, flavonoidlər, pektin və antioksidantlarla zəngindir. Onun tərkibindəki lif həzm sistemini tənzimləyir, xolesterinin azalmasına kömək edir və bağırsaq mikroflorasını gücləndirir.
Bundan başqa, meyvədəki kalium qan təzyiqini sabitləşdirir, antioksidantlar isə dəri və hüceyrə qocalmasını ləngidir.
Marakuya isə daha çox C vitamini və orqanizmi sakitləşdirən təbii maddələrlə tanınır, buna görə də o, yüngül əsəb gərginliyinin və yuxusuzluğun azaldılmasında faydalı sayılır.
Fərqləndirici cəhətlər
Dad: Qranadilla – şirin və yumşaq, marakuya – turş və ətirli.
Qabıq: Qranadilla – açıq sarı, marakuya – tünd bənövşəyi və ya sarı.
Tərkib: Qranadilla – daha çox lif və pektin, marakuya – daha çox C vitamini.
Təsiri: Qranadilla – həzmi yaxşılaşdırır, marakuya – sinir sistemini sakitləşdirir.
İstifadə və ehtiyat tədbirləri
Qranadillanı təzə halda yemək, desertlərdə və şirələrdə istifadə etmək mümkündür. Lakin çox miqdarda tum yemək mədə selikli qişasını qıcıqlandıra bilər. Həmçinin allergiyaya meyilli şəxslərə ehtiyatla qəbul etmək tövsiyə olunur.
Mütəxəssislərin fikrincə, hər iki meyvə orqanizm üçün dəyərlidir, lakin qranadilla – daha şirin və yumşaq dadlı, marakuya – daha turş və canlandırıcı meyvədir.
Hər iki tropik məhsul düzgün miqdarda qəbul olunduqda immuniteti gücləndirir, orqanizmi antioksidantlarla təmin edir və sağlam qidalanmanın tərkib hissəsi ola bilər.
