Son illərdə populyar olan suşi və roll kimi yeməklər dadlı olsa da, onların çox miqdarda qəbulu sağlamlıq üçün təhlükəli ola bilər. Foodinfo.az xəbər verir ki, Piroqov Universitetinin İnsan Biologiyası və Patologiyası İnstitutunun dosenti, qastroenteroloq Yekaterina Titova pankreasın (mədəaltı vəzinin) bu cür yeməklərdən zərər görə biləcəyini bildirib.

Mütəxəssisin sözlərinə görə, böyük porsiyalar halında suşi və roll yeyildikdə pankreas eyni anda həm karbohidratların (düyü), həm də yağların (pendir, souslar) həzmi üçün çoxlu miqdarda ferment istehsal etməyə məcbur qalır. Bu isə orqanın həddindən artıq yüklənməsinə və iltihabi proseslərin yaranmasına səbəb ola bilər.

Titova qeyd edib ki, bu cür yeməklər piylənməsi, aterosklerozu və şəkərli diabeti olan şəxslər üçün xüsusilə təhlükəlidir.

Həkim balanslı qidalanmaya üstünlük verməyi, suşi və rollu nadiren və kiçik porsiyalarda qəbul etməyi tövsiyə edir. “Əsas məsələ miqdardır — bir neçə ədəd roll bədəni zərərsiz şəkildə doyura bilər, lakin böyük setlər artıq orqanizm üçün yükdür,” – deyə mütəxəssis bildirib.

Qastroenteroloq əlavə edib ki, bu yeməkləri qəbul edərkən yağlı souslardan imtina etmək və təzə tərəvəzlər ilə birlikdə yemək həzmi yüngülləşdirir.

Beləliklə, suşi və roll ləzzətli olsa da, sağlam qalmaq üçün onların miqdarına nəzarət etmək vacibdir.