Zeytun yağı dünyanın ən faydalı bitki yağlarından biri hesab olunur və bir çox sağlam qidalanma proqramlarında əsas məhsullardan biri kimi göstərilir. Mütəxəssislər bildirirlər ki, bu yağın müntəzəm istifadəsi ürək-damar sisteminin qorunmasına kömək edə bilər.

Foodinfo.az Medical News Today saytına istinadla xəbər verir ki, dietoloq Loren Manakerin sözlərinə görə, zeytun yağı tərkibində olan mono-doymamış yağ turşuları sayəsində qanda “pis” xolesterinin səviyyəsinin azalmasına kömək edə bilər. Bu xüsusiyyət damarların elastikliyini qorumağa və ürək xəstəlikləri riskini azaltmağa dəstək verir.

Mütəxəssis qeyd edir ki, zeytun yağında həmçinin güclü antioksidant təsirə malik polifenollar da mövcuddur. Bu maddələr orqanizmdə iltihab proseslərinin azalmasına və hüceyrələrin qorunmasına kömək edir.

Araşdırmalar göstərir ki, zeytun yağının xüsusilə salatlarda və soyuq yeməklərdə istifadə edilməsi onun faydalı xüsusiyyətlərini daha yaxşı qorumağa imkan verir.