Bu ilin yanvar- fevral aylarında Azərbaycanda istehlakçılarla bağlanmış müqavilələrin ləğv edilməsi, lazımi keyfiyyətdə olan, lakin istehlakçıların tələblərini ödəməyən, həmçinin qüsurlu malların qaytarılması və digər hallarla bağlı təmin olunmuş müraciətlər üzrə sahibkarlar tərəfindən 149 min 650 manat vəsait istehlakçılara qaytarılıb.

Bu barədə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti məlumat yayıb.

Bu göstərici 2023-cü ilin müvafiq dövrü ilə müqayisədə 5 dəfəyədək artıb.

"Dövlət Xidməti tərəfindən istehlakçıların və sahibkarlıq subyektlərinin istehlakçı hüquqları ilə bağlı məlumatlılığının artırılması istiqamətində aparılan maarifləndirmə tədbirləri öz müsbət nəticəsini verir", - məlumatda deyilir.