Bir çox insan stress və gərginlik zamanı əhvalını yaxşılaşdırmaq üçün spirtli içkiyə müraciət edir. Lakin mütəxəssislər bildirirlər ki, bu təsir yalnız qısa müddətli olur və əslində insanın psixoemosional vəziyyətini daha da pisləşdirə bilər.

Foodinfo.az xarici mediaya istinadla xəbər verir ki, psixiatr Sergey Litkovun sözlərinə görə, alkoqol qəbulundan sonra yaranan yaxşı əhval hissi sadəcə müvəqqəti təsirdir. İçkinin təsiri bitdikdən sonra beyindəki neyromediatorların səviyyəsi əvvəlkindən də aşağı düşür və nəticədə insan daha güclü narahatlıq, kədər və emosional eniş hiss edə bilər.

Mütəxəssis qeyd edir ki, stressi spirtli içki ilə “müalicə etmək” vərdişi zamanla vəziyyəti daha da ağırlaşdırır. Çünki bu zaman insanın təbii stresslə mübarizə mexanizmləri – idman, hobbi və digər faydalı məşğuliyyətlər tədricən zəifləyir.

Həkim əlavə edir ki, alkoqolizm zamanı insanın beynində müəyyən refleks formalaşır: “stress = spirtli içki = rahatlama”. Bu isə psixoloji asılılığın yaranmasına və emosional vəziyyətin daha da qeyri-sabit olmasına səbəb ola bilər.