İçməli suyun keyfiyyəti son illərdə alimlərin diqqət mərkəzində olan əsas mövzulardan biridir. Xüsusilə suyun tərkibindəki mikoplastik hissəciklərin insan sağlamlığına təsiri ilə bağlı aparılan araşdırmalar yeni nəticələr ortaya qoyur. Foodinfo.az Doctorpiter saytına istinadla bildirir ki, alimlər qaynadılmış suyun gözlənilməz faydasını müəyyən ediblər.
Araşdırmaya görə, suyun qaynadılması təkcə bakteriyaları məhv etmir, həm də mikoplastik hissəciklərin böyük hissəsinin sudan ayrılmasına kömək edir. Çin alimlərinin apardığı tədqiqat nəticəsində məlum olub ki, qaynatma prosesi suyun tərkibində olan bəzi plastik hissəciklərin çökərək ayrılmasına səbəb olur.
Tədqiqatı aparan mütəxəssislər bildirirlər ki, xüsusilə sərt suda qaynatma prosesi daha effektiv nəticə verir. Belə sularda olan kalsium hidrogenkarbonat qaynama zamanı kalsium karbonata çevrilir və çaydanın divarlarında əmələ gələn ərp qatını formalaşdırır. Bu qat plastik hissəcikləri də özünə çəkərək onların suyun dibinə çökməsinə səbəb olur.
Alimlərin hesablamalarına görə, qaynatma prosesi nəticəsində suyun tərkibindəki polistirol, polietilen və polipropilen kimi plastik hissəciklərin təxminən 80 faizini aradan qaldırmaq mümkündür. Lakin su yalnız 90 dərəcəyə qədər qızdırıldıqda bu effekt tam əldə olunmur və mikoplastikin yalnız bir hissəsi ayrılır.
Tədqiqatçılar qeyd edirlər ki, suyun sərtlik dərəcəsi də nəticəyə təsir göstərir. Sərt sularda mikoplastikin daha böyük hissəsi təmizlənə bildiyi halda, yumşaq sularda bu göstərici təxminən 25 faiz civarında olur. Buna baxmayaraq, bu da müəyyən qədər təmizlənmə effekti yaradır.
Mütəxəssislər eyni zamanda su qaynadılarkən bəzi qaydalara riayət etməyi tövsiyə edirlər. Çaydanın dibində qalan suyun tam istifadə olunmaması və qabın mütəmadi olaraq ərpdən təmizlənməsi məsləhət görülür. Həmçinin hər dəfə su qaynadarkən çaydana təzə su əlavə etmək daha düzgün hesab edilir.
Alimlərin digər araşdırmaları göstərir ki, bir litr kran suyunda orta hesabla bir neçə mikoplastik hissəciyi mövcud ola bilər. Bu hissəciklər çox kiçik olduğuna görə insan orqanizminə daxil olaraq müxtəlif sağlamlıq problemləri yarada bilər.
Mütəxəssislərin fikrincə, suyun qaynadılması sadə və əlçatan üsul olmaqla yanaşı, içməli suyun keyfiyyətini müəyyən qədər yaxşılaşdırmağa kömək edən effektiv üsullardan biridir.
