Dərinin sağlam və gənc görünməsi üçün düzgün qidalanma mühüm rol oynayır. Foodinfo.az bildirir ki, gündəlik rasionda bəzi təbii məhsullara üstünlük verməklə dəridə elastiklik və parlaqlığı qorumaq mümkündür.

Mütəxəssislərin fikrincə, avokado dərini nəmləndirən faydalı yağlarla zəngindir və kollagenin parçalanmasının qarşısını alır. Balıq növlərindən xüsusilə qızılbalıq omeqa-üç yağ turşuları ilə dəriyə elastiklik verir və quruluğu azaldır.

C vitamini ilə zəngin portağal, kivi və çiyələk kollagen sintezini gücləndirərək dərinin cavan qalmasına kömək edir. Pomidorun tərkibindəki likopen ultrabənövşəyi şüaların yaratdığı zədələrdən qoruyur.

Yaşıl çay güclü antioksidant təsiri ilə dəridə qocalmanı ləngidir və hüceyrələrin bərpasını sürətləndirir. Qoz, badam və fındıq kimi çərəzlər E vitamini ilə zəngin olub, dərini sərbəst radikallardan qoruyur.

Su da dərinin təravətini saxlamaq üçün ən vacib amillərdəndir. Gün ərzində kifayət qədər su qəbul etməklə quruluq və solğunluğun qarşısını almaq mümkündür.

Mütəxəssislər vurğulayır ki, bu məhsulları müntəzəm istehlak edən şəxslərdə dəri daha sağlam və parlaq görünür. Sağlam qidalanma ilə yanaşı, günəşdən qorunma və düzgün yuxu rejimi də dərinin gəncliyini uzun müddət saxlamağa kömək edir.