İnsan orqanizminin enerjili qalması və gün boyu gümrah olması üçün düzgün qidalanma böyük rol oynayır. Foodinfo.az xəbər verir ki, Rusiya Qida Biotexnologiyası və Mühəndisliyi İnstitutunun direktoru, texnika elmləri namizədi Dmitri Kulikov bu məqsədlə ən faydalı hesab edilən qidaların siyahısını açıqlayıb.
Alim bildirib ki, tam dənəli məhsullar — yulaf, qarabaşaq, kinoa və tam buğda çörəyi — uzunmüddətli enerji verir. Onun sözlərinə görə, bu məhsullar tərkibindəki mürəkkəb karbohidratlar sayəsində orqanizmi bir neçə saat ərzində tədricən enerji ilə təmin edir. Həmçinin, bu dənli bitkilər B qrupu vitaminləri ilə zəngindir və bu vitaminlər beynin fəaliyyəti və sinir sisteminin sağlamlığı üçün vacibdir.
Kulikov qeyd edib ki, tam dənəli sıyıqlar — hazır qarışıq və toz halında olan “tez bişən” məhsullardan fərqli olaraq — orqanizmə daha çox fayda verir, çünki onların tərkibi təbii maddələrlə zəngin olur və qanda şəkərin səviyyəsini sabit saxlayır.
Mütəxəssis əlavə edib ki, alma, banan, sitrus meyvələri, giləmeyvələr və yaşıl tərəvəzlər də enerjinin qorunması üçün vacibdir. Bu meyvələrin tərkibindəki təbii şəkərlər və lif orqanizmə enerji verir, həm də toxluq hissini uzadır. Həmçinin, bu məhsullar vitamin, mineral və antioksidant mənbəyi kimi bədənə stres və yorğunluğa qarşı mübarizədə kömək edir.
Alim xüsusilə C vitamini və maqneziumun bədənin tonusunun saxlanması və hüceyrələrin gümrahlığı üçün vacib olduğunu vurğulayıb.
Kulikovun sözlərinə görə, qoz-fındıq, balqabaq və kətan toxumları da güclü enerji mənbəyidir. Onlar tərkibindəki zülal, lif, faydalı yağ turşuları və minerallar sayəsində beyin, ürək və həzm sisteminin fəaliyyətini gücləndirir. Bu məhsullar enerjini yavaş-yavaş buraxdığı üçün uzunmüddətli fiziki və zehni fəaliyyət zamanı xüsusilə faydalıdır.
Mütəxəssis həmçinin yağsız ət, balıq, yumurta və paxlalı bitkilərin rasionda vacib yer tutduğunu bildirib. Bu məhsullardakı zülal orqanizmdə qidaların mənimsənilməsini tənzimləyir, qan şəkərinin qəfil artmasının qarşısını alır, həm də hüceyrələrə oksigenin daşınmasında iştirak edir. Oksigen isə enerjinin hüceyrə səviyyəsində yaranması üçün əsas amildir.
Kulikov deyib ki, zülal eyni zamanda əzələlərin fəaliyyəti, toxumaların bərpası və uzunmüddətli toxluq hissi üçün də vacibdir.
Mütəxəssis əlavə edib ki, süd məhsulları da orqanizm üçün faydalıdır, çünki onlar kalsium və B qrupu vitaminləri ilə zəngindir və bu maddələr sinir sisteminin fəaliyyətində mühüm rol oynayır. Lakin o xəbərdarlıq edib ki, yalnız süd məhsullarından ibarət qidalanma bədənin enerji ehtiyacını tam qarşılaya bilmir.
Sonda alim gündəlik su qəbulunun əhəmiyyətini xatırladıb. Onun sözlərinə görə, orqanizmdə cəmi 1–2 faiz maye itkisi belə diqqətin azalmasına, düşünmə qabiliyyətinin zəifləməsinə və yorğunluğa səbəb olur. Buna görə də gün ərzində kifayət qədər su içmək orqanizmin enerjili qalması üçün vacibdir.
