Müasir tədqiqatlar göstərir ki, bəzi tərəvəzlər şəkərin orqanizmə mənfi təsirini azaltmağa kömək edir. Foodinfo.az xəbər verir ki, Kaliforniya Universitetinin Irvayn kampusunun alimləri aparılan araşdırmalar nəticəsində belə nəticəyə gəliblər.
Tədqiqat qrupu, doktor Çolsun Çjanın rəhbərliyi ilə, soğan, sarımsaq və artişokun xüsusi növ lif — inulin ehtiva etdiyini müəyyən edib. Alimlərin açıqlamasına görə, inulin bağırsaq mikroflorasının tərkibini dəyişdirərək bakteriyaların şəkərin bir hissəsini qaraciyərə çatmadan yandırmasına şərait yaradır.
Bu mexanizm qaraciyərin yükünü azaldır və qeyri-alkoqollu piyli qaraciyər xəstəliyi ilə insulin müqavimətinin riskini minimuma endirir.
Əlavə olaraq, inulin qanda qalan şəkərin faydalı maddələrə — serin və qlutatyon kimi birləşmələrə çevrilməsinə kömək edir. Bu maddələr qaraciyərdə iltihabın azalmasına və hüceyrələrin qorunmasına dəstək verir.
Alimlər qeyd edirlər ki, bu tərəvəzlərin müntəzəm istehlakı şəkərin mənfi təsirlərini azaltmaqla yanaşı, ümumi qaraciyər sağlamlığını qorumağa da kömək edir. Buna görə, balanslı qidalanma və tərəvəzlərin rasiona daxil edilməsi xüsusilə vacibdir.
