Yaşıl göyərti təkcə yeməklərə dad qatan inqrediyent deyil, həm də ürək və damar sağlamlığının mühüm qoruyucusudur. Foodinfo.az xəbər verir ki, həkim-diyetoloq, tibb elmləri namizədi Nataliya Denisova göyərtinin tərkibindəki faydalı maddələrin infarkt və insult riskini azaltdığını bildirib.

Mütəxəssisin sözlərinə görə, göyərti orqanizm üçün vacib olan antioksidantlar, bioloji fəal maddələr, C vitamini, karotinoidlər, fol turşusu, maqnezium, kalium və dəmir ilə zəngindir. Bu birləşmələr qan dövranını yaxşılaşdırır, damarların elastikliyini qoruyur və xolesterinin yığılmasının qarşısını alır.

Göyərtinin tərkibindəki bu maddələr damar divarlarını möhkəmləndirir, qanı durulaşdırır və laxtalanmanın qarşısını alır. Beləliklə, müntəzəm olaraq göyərti yemək tromb yaranması və damar tutulması riskini azaldır.

Xüsusilə K vitamini yaşıl yarpaqlı tərəvəzlərdə (ispanaq, cəfəri, kərəviz və s.) bol miqdarda olur. Bu vitamin damar divarlarında duzların və kalsiumun yığılmasının qarşısını alır — bu da ürək-damar xəstəliklərinin əsas səbəblərindən biridir.

Bundan başqa, kalium orqanizmdə artıq suyun xaric olunmasına kömək edir, qan təzyiqini tənzimləyir və şişkinliyi azaldır.

Mütəxəssislər bildirirlər ki, göyərtini gündəlik qidalanmaya daxil etmək ürək-damar sistemini qorumağın ən sadə, lakin təsirli yollarından biridir.