Arı sancması çox zaman yüngül ağrı, şişkinlik və qızartı ilə müşahidə olunur. Foodinfo.az bildirir ki, əksər insanlarda bu hal təhlükəli deyil və qısa müddətdə keçir. Lakin bəzi hallarda arı sancması həyati risk daşıya bilər.

Mütəxəssislərin sözlərinə görə, allergiyası olmayan insan üçün arı sancması ciddi problem yaratmır. Ancaq allergiyası olan şəxslərdə hətta bir sancma belə güclü reaksiyaya səbəb ola bilər. Bu vəziyyət "anafilaktik şok" adlanır və təcili tibbi müdaxilə tələb edir.

Anafilaktik şok zamanı nəfəs darlığı, boğazda şişkinlik, güclü qaşınma, başgicəllənmə və qan təzyiqinin kəskin düşməsi müşahidə olunur. Belə hallarda insanın həyatını xilas etmək üçün dərhal təcili yardım çağırmaq vacibdir.

Həkimlər bildirirlər ki, arı sancmasına qarşı güclü allergiyası olan şəxslər hər zaman özləri ilə adrenalin inyeksiyası (EpiPen) gəzdirməlidirlər. Bu, ağır allergik reaksiyanın qarşısını almaqda həyati əhəmiyyət daşıyır.

Digər insanlarda isə sancmadan sonra yaranan şişkinlik və ağrı üçün sadəcə soyuq kompres və antihistamin dərmanları kifayət edir.