Qara qəhvə bu gün bir çox insan üçün sadəcə içki deyil, həm də gündəlik ritmin ayrılmaz parçasıdır. Foodinfo.az bildirir ki, qara qəhvə tərkibindəki güclü antioksidantlar sayəsində hüceyrələrin oksidativ stressə qarşı müdafiəsini gücləndirir və bu, ürək-damar sisteminin sağlamlığında mühüm rol oynayır. Kofein maddəsi beyin fəaliyyətini stimullaşdırmaqla yanaşı, diqqəti artırır və yuxululuğu azaldır, bu səbəbdən tələbələr və ofis işçiləri üçün tez-tez seçimə çevrilir. Eyni zamanda, qəhvə mədə turşusunun ifrazını artıraraq həzmi sürətləndirir, lakin bu xüsusiyyət bəzi insanlar üçün problem yarada bilər. Araşdırmalar göstərir ki, gündə iki-üç fincan qara qəhvə qəbul etmək xroniki xəstəliklərin riskini azaldır və uzunömürlülüyə müsbət təsir göstərə bilər.

Bununla belə, qəhvənin həddindən artıq qəbulu orqanizmdə narahatlıq, əzələ titrəmələri, yuxusuzluq və ürək döyüntüsündə artım kimi əlamətlərlə müşahidə oluna bilər. Həkimlərin fikrincə, xüsusilə mədə xorası və qastrit kimi həzm sistemi problemləri olan şəxslər qara qəhvədən uzaq durmalı və ya qəbulunu minimum səviyyəyə endirməlidirlər. Boş mədəyə içilən qəhvə mədə turşuluğunu əhəmiyyətli dərəcədə artırır ki, bu da yanğı, qaz və ağrılara səbəb ola bilər. Mütəxəssislər hesab edir ki, südlü qəhvə qara qəhvəyə nisbətən mədəyə daha az qıcıqverici təsir göstərir, çünki süd turşuluğu neytrallaşdıra bilər.