Duz orqanizmin elektrolit balansı üçün vacib bir element olsa da, onun normadan artıq qəbulu sağlamlıq üçün ciddi risklər yaradır. Böyrəklər duzun tərkibindəki natriumun orqanizmdə tənzimlənməsi ilə məşğuldur. Lakin duz qəbulu artdıqca, böyrəklərin yüklənməsi də artır və bu da onların fəaliyyətində pozğunluqlara səbəb olur.

Foodinfo.az xəbər verir ki, artıq natrium bədəndə suyun tutulmasına səbəb olur və bu da qan təzyiqinin yüksəlməsi ilə nəticələnir. Hipertoniya isə zamanla ürək, damar və böyrək sistemlərinə ciddi zərər verə bilər. Davamlı yüksək təzyiq böyrək damarlarının daralmasına, böyrək funksiyalarının zəifləməsinə və hətta xroniki böyrək çatışmazlığına gətirib çıxara bilər.

Böyrəklərin düzgün işləməməsi nəticəsində orqanizmdə toksinlər yığıla bilər, bu da həm immun sisteminə, həm də ümumi sağlamlığa mənfi təsir edir. Duzun çox istifadəsi sidik yollarında daşların yaranmasına da səbəb ola bilər, çünki natrium kalsium ifrazını artırır və bu da sidikdə kristallaşmanı gücləndirir.

Ümumdünya Səhiyyə Təşkilatı gündəlik duz qəbulunun 5 qramdan artıq olmamasını tövsiyə edir. Fast-food, konservləşdirilmiş məhsullar və hazır qidalar duzun əsas mənbələri arasında yer alır. Təbii ədviyyatlarla yeməkləri dadlandırmaq daha sağlam bir alternativdir.