Qarında köp və narahatlıq çox vaxt birbaşa qidalanma ilə əlaqəli olur və gündəlik rasion bu problemin yaranmasında mühüm rol oynayır.
Mütəxəssislərin fikrincə, bəzi qidaların tərkibində olan maddələr nazik bağırsaqda tam həzm olunmur və yoğun bağırsaqda bakteriyalar tərəfindən parçalanaraq qaz əmələ gətirir.
Foodinfo.az Aif.ru saytına istinadla xəbər verir ki, bu proses nəticəsində meteorizm, yəni həddindən artıq qaz yığılması və şişkinlik müşahidə olunur.

Paxlalı bitkilər tərkibində olan mürəkkəb şəkərlər səbəbindən ən çox qaz yaradan qidalar sırasındadır. Orqanizmdə bu maddələri parçalayan fermentlər kifayət qədər olmadığından onlar demək olar ki, dəyişilməmiş halda yoğun bağırsağa çatır və qaz əmələ gəlməsini artırır.

Kələm, brokkoli və gül kələmi kimi tərəvəzlər də şişkinliyə səbəb ola bilər. Bu məhsulların tərkibində olan kükürdlü birləşmələr və mürəkkəb şəkərlər qazın həm miqdarını artırır, həm də xoşagəlməz qoxu yaradır.

Qazlı içkilər isə tərkibində həll olunmuş karbon qazı saxladığı üçün həzm sistemində havanın həcmini birbaşa artırır və köpə səbəb olur.

Fruktoza və sorbitol baxımından zəngin qidalar da həzm zamanı çətinlik yaradır. Bu maddələr zəif sorulduğuna görə bağırsaqda suyu cəlb edir və qaz yaradan bakteriyalar üçün əlverişli mühit formalaşdırır.

Soğan və sarımsaq tərkibində olan xüsusi karbohidratlara görə bir çox insanda köp və qaz yığılmasına səbəb ola bilər.

Bundan əlavə, laktoza dözümsüzlüyü olan şəxslərdə süd məhsulları, eləcə də tam taxıllı məhsullar və bəzi dənli bitkilər meteorizmi gücləndirə bilər. Xəmir məmulatlarında maya ilə sadə karbohidratların birləşməsi isə bağırsaqda mayalanma proseslərini sürətləndirir.

Mütəxəssislər bildirirlər ki, şişkinlikdən əziyyət çəkən şəxslər bu qidaları rasionda azaldaraq və ya düzgün şəkildə birləşdirərək həzm rahatlığını xeyli yaxşılaşdıra bilərlər.