Qidalanma vərdişlərində kiçik dəyişikliklər etmək diabet riskinin azalmasına kömək edə bilər. Mütəxəssislər hesab edirlər ki, sağlam seçimlərə mərhələli şəkildə keçid həm maddələr mübadiləsinin yaxşılaşmasına, həm də artıq çəkinin qarşısının alınmasına müsbət təsir göstərir. Foodinfo.az Lenta.ru saytına istinadla xəbər verir ki, dietoloq və qastroenteroloq Nuriya Dianova şəkərli diabetin profilaktikası üçün sağlam qidalanma vərdişlərinin tədricən formalaşdırılmasını tövsiyə edib.
Mütəxəssisin sözlərinə görə, ilk addımlardan biri şəkərli qazlı içkilərin istehlakını azaltmaqdır. O bildirib ki, bu içkilər qanda şəkər və insulin səviyyəsinin kəskin yüksəlməsinə səbəb ola bilər. Nuriya Dianova qeyd edib ki, insulinə həssaslığın azalması metabolik sindrom, sürətli çəki artımı və 2-ci tip diabet riskinin yüksəlməsi ilə əlaqələndirilir.
Həkim vurğulayıb ki, bir qutu qazlı içki bəzən insanın bir günlük şəkər ehtiyacını tam ödəyə və hətta onu aşmağa qadirdir. Buna görə də şəkərli içkilərin yerinə su, şəkərsiz bitki çayları və ya təbii içkilərə üstünlük verilməsi daha məqsədəuyğundur.
Dietoloq növbəti mərhələdə ağ undan hazırlanan məhsulların miqdarının azaldılmasını tövsiyə edib. Onun sözlərinə görə, ağ çörək, şirin bulkalar, piroqlar və digər xəmir məhsulları əvəzinə tam taxıllı və ya çovdar çörəyinin seçilməsi daha faydalıdır. Ev şəraitində hazırlanan xəmir məhsullarında isə daha faydalı un növlərindən istifadə etmək mümkündür.
Nuriya Dianova həmçinin kolbasa, sosiska, vetçina və bekon kimi emal olunmuş ət məhsullarının istehlakını azaltmağın vacibliyini qeyd edib. O bildirib ki, bu məhsulların tərkibində çoxlu duz, doymuş yağlar və müxtəlif konservantlar olur. Bu maddələr orqanizmdə iltihabi prosesləri gücləndirə, insulinə həssaslığı azalda və maddələr mübadiləsinə əlavə yük yarada bilər.
Mütəxəssis hesab edir ki, sağlam qidalanma vərdişləri birdən-birə deyil, mərhələli şəkildə formalaşdırıldıqda daha davamlı nəticə verir. Qidalanmada sadə dəyişikliklər uzunmüddətli perspektivdə həm diabet riskinin azalmasına, həm də ümumi sağlamlığın yaxşılaşmasına kömək edə bilər.
