Hipertoniyadan əziyyət çəkən insanların uzun illər boyu qəhvədən uzaq durmalı olduqları düşünülürdü, lakin son elmi yanaşmalar göstərir ki, bu fikir artıq tam aktuallığını itirib və qəhvə düzgün miqdarda qəbul edildikdə təhlükəli deyil. Araşdırmalar sübut edir ki, qəhvə təzyiqi qısa müddətə və cüzi şəkildə yüksəldə bilər, lakin bu təsir xüsusilə müntəzəm qəhvə içən insanlarda zəifləyir və orqanizm zamanla buna uyğunlaşır.
Foodinfo.az BB.LV saytına istinadla xəbər verir ki, mütəxəssislərin fikrincə, mülayim miqdarda qəhvə istehlakı ürək ritminə mənfi təsir göstərmir və əksinə, bəzi hallarda ritm pozğunluqlarının riskini azalda bilər. Bununla yanaşı, kofein mərkəzi sinir sistemini stimullaşdıraraq zehni və fiziki aktivliyi artırır, yorğunluğu azaldır və diqqəti yaxşılaşdırır ki, bu da gündəlik həyat keyfiyyətinə müsbət təsir edir.

Həkimlərin tövsiyəsinə görə, hipertoniyadan əziyyət çəkən insanlar üçün gündə təxminən 3–4 fincan qəhvə təhlükəsiz hesab olunur və bu miqdar bəzi hallarda hətta faydalı ola bilər, lakin hər bir insanın orqanizmi fərqli reaksiya verdiyi üçün fərdi yanaşma vacibdir. Kardioloqlar sadə üsul təklif edir: qəhvə içməzdən əvvəl və içdikdən 30–120 dəqiqə sonra təzyiqi ölçmək lazımdır, əgər göstəricidə 5–10 vahid artım və ürək döyüntüsündə sürətlənmə müşahidə olunursa, bu zaman qəhvə qəbulunu azaltmaq və ya həkimlə məsləhətləşmək daha məqsədəuyğun sayılır.