Balıq və dəniz məhsulları damarların sağlamlığını qorumaqda mühüm rol oynayır. Foodinfo.az RİAMO-ya istinadla xəbər verir ki, “Medisina” klinikasının (akademik Roytberqin klinikası) həkim-kardioloqu, tibb elmləri namizədi Yevgeni Kokin bu barədə danışarkən bildirib ki, balıq yemək damarların elastikliyini artırır və orqanizmdə iltihabi proseslərin inkişafını azaldır.
Mütəxəssisin sözlərinə görə, balıq və dəniz məhsullarının tərkibindəki omeqa-3 yağ turşuları qanı təbii yolla duruldur, qan dövranını yaxşılaşdırır və mikrosirkulyasiyanı normallaşdırır. Bu da ürək-damar sisteminin yükünü azaldır və ürək xəstəliklərinin qarşısının alınmasına kömək edir.
Kokin əlavə edib ki, omeqa-3 yağ turşuları həmçinin qan təzyiqini tənzimləyir, xolesterin səviyyəsini aşağı salır və damarların vaxtından əvvəl daralmasının qarşısını alır. Onun fikrincə, bu maddələr insan orqanizmi tərəfindən sintez olunmadığı üçün onları qidalar vasitəsilə qəbul etmək vacibdir.
Həkim qeyd edib ki, həftədə ən azı iki dəfə balıq yemək damar və ürək sağlamlığını qorumaq üçün kifayət qədər təsirli addımdır. Xüsusilə skumbriya, qızılbalıq, siyənək və sardina kimi dəniz balıqları omeqa-3 baxımından daha zəngindir.
Kardioloq onu da vurğulayıb ki, sağlam damar sistemi üçün yalnız balıq deyil, eyni zamanda tərəvəz, meyvə, qoz, müxtəlif toxumlar və tam dənli məhsullar da gündəlik rasionda yer almalıdır.
O, insanların fast-fud, qızardılmış və duzlu qidaları azaltmasını, daha çox buxarda və ya sobada bişirilmiş yeməklərə üstünlük verməsini tövsiyə edib.
