Yoğun bağırsaq xərçəngi ən çox rast gəlinən onkoloji xəstəliklərdən biri hesab olunur və əksər hallarda uzun müddət gizli inkişaf edir. Mütəxəssislər bildirir ki, vaxtında profilaktika və müayinələr xəstəliyin qarşısının alınmasında mühüm rol oynayır. Foodinfo.az NEWS.ru saytına istinadla xəbər verir ki, onkoloq Basir Bammatovun sözlərinə görə, yoğun bağırsaq xərçənginin əsas səbəbi əvvəlcədən mövcud olan xoşxassəli poliplərin zamanla bədxassəli şişə çevrilməsidir.
Həkim qeyd edib ki, polipin xərçəngə çevrilmə prosesi adətən uzun illər çəkir və bu da xəstəliyin qarşısını almaq üçün real imkanlar yaradır. Onun sözlərinə görə, risk faktorları arasında qidalanma vərdişləri xüsusi yer tutur.
Basir Bammatov bildirib ki, qida rasionunda qırmızı və emal olunmuş ətin üstünlük təşkil etməsi, lifli qidaların az qəbulu, azhərəkətli həyat tərzi və artıq çəki yoğun bağırsaq xərçəngi riskini artırır. Bundan əlavə, xroniki bağırsaq iltihabi xəstəlikləri, siqaret çəkmə və alkoqoldan sui-istifadə də mənfi amillər sırasındadır.
Onkoloq irsi faktorun da xüsusi əhəmiyyət daşıdığını vurğulayıb. Onun sözlərinə görə, yaxın qohumlarda bu xəstəliyin olması fərdi riskləri əhəmiyyətli dərəcədə artırır.
Mütəxəssis qeyd edib ki, yoğun bağırsaq xərçənginin profilaktikası və erkən aşkarlanmasının əsas yolu skrininq müayinələridir. Bu müayinələrə nəcisdə gizli qanın analizi və yoğun bağırsağın endoskopik yoxlanışı daxildir. Skrininq müayinələrinin müəyyən edilmiş yaş dövrlərində, ailəvi risk olduqda isə fərdi göstərişlər əsasında aparılması tövsiyə olunur.
