İşlənmiş qidaların mütəmadi istehlakı yüksək insult riski də daxil olmaqla, sağlamlıq üçün ciddi təhlükələr yarada bilər. Foodinfo.az xəbər verir ki, çips, qazlı içkilər, hazır yeməklər kimi işlənmiş qidalar çox miqdarda duz, şəkər və trans yağlar ehtiva edir. 

Bu maddələr qan təzyiqini və xolesterolu artırır, damarların sərtləşməsinə və iltihablanmaya səbəb olur ki, bu da insult riskini yüksəldir. 

Tərkibindəki süni qatqılar, konservantlar və qida boyaları bədəndə iltihab yaradır. Uzun müddət işlənmiş qida istifadəsi ürək-damar sisteminə zərər verir, çünki bu qidalar bədəndə qan dövranını çətinləşdirir və qan damarlarının zədələnməsinə səbəb olur. 

İşlənmiş qidaların lif tərkibi isə çox aşağıdır, bu da qanda şəkəri yüksəldir və insulin müqavimətini artırır.

Belə qidalar əvəzinə təbii və balanslı qidalanma, təzə meyvə-tərəvəz və tam taxılların istehlakı insult riskini azaltmağa kömək edə bilər. 

Sağlam qidalanma ürək və damar sağlamlığını qoruyur, iltihablanmanı azaldır və qanda şəkərin balansını təmin edir. Bu da uzun müddətdə insult və digər ciddi xəstəliklərin qarşısını almaqda əhəmiyyətli rol oynayır.