Yaşıl, yəni tam yetişməmiş pomidorların istifadəsi orqanizm üçün təhlükəli ola bilər. Foodinfo.az xəbər verir ki, “Gemotest” laboratoriyasının ekspert-həkimi, qastroenteroloq Yekaterina Kaşux bu barədə açıqlama verib.

Onun sözlərinə görə, yetişməmiş pomidorların tərkibində solanin və ona yaxın tomatin adlı toksik maddələr mövcuddur. Bu maddələr çox miqdarda qəbul edildikdə bədəndə mənfi reaksiyalar yarada bilər.

Mütəxəssis bildirib ki, yaşıl pomidorların tez-tez və çoxlu miqdarda yeyilməsi ürəkbulanma, qarın ağrısı, halsızlıq, baş ağrısı, hətta şüur qarışıqlığına səbəb ola bilər.

Kaşux qeyd edib ki, istilik emalı zamanı bu toksinlərin bir hissəsi parçalanır. Buna görə də bişirilmiş yaşıl pomidor yeməkləri — marinad, duza qoyulmuş və ya qurudulmuş formada — sağlamlıq üçün ciddi risk daşımır.

Ekspert istehlakçılara məsləhət görüb ki, gündəlik rasionda yalnız tam yetişmiş pomidorlardan istifadə etsinlər və çiy yaşıl pomidordan çəkinməyə çalışsınlar.