Qidalanma rejiminin düzgün qurulması qanda “pis” xolesterin kimi tanınan aşağı sıxlıqlı lipoproteinlərin səviyyəsinin azalmasına kömək edə bilər. Mütəxəssislər bildirirlər ki, bəzi qidalar damarların qorunmasında və ürək-damar sisteminin sağlamlığında mühüm rol oynayır.

Foodinfo.az xarici mətbuata istinadla xəbər verir ki, həkim Olqa Tarasovanın sözlərinə görə, “pis” xolesterini azaltmaq üçün ən təsirli maddələrdən biri həll olunan liflərdir. Bu liflər bağırsaqlarda jelə bənzər quruluş yaradaraq öd turşularını özünə bağlayır və nəticədə orqanizm yeni öd hazırlamaq üçün qandakı xolesterindən istifadə edir. Bu maddələr əsasən yulaf, arpa, paxlalılar, alma, armud, sitrus meyvələri, kök, badımcan və kətan toxumunda olur.

Mütəxəssis qeyd edir ki, çoxlu doymamış yağ turşuları, xüsusilə omeqa-3 də lipid mübadiləsini yaxşılaşdırır və qanda yağların səviyyəsinin azalmasına kömək edir. Bu maddələr hüceyrə membranlarının quruluşuna daxil olaraq orqanizmdə yağ balansının tənzimlənməsinə müsbət təsir göstərir.

Bundan əlavə, bitki mənşəli sterollar və stanollar da xolesterinin azalmasına dəstək verir. Bu maddələr bağırsaqlarda xolesterinlə rəqabət apararaq onun sorulmasını azaldır. Onlar əsasən bitki yağlarında, qoz-fındıq və toxumlarda, eləcə də bəzi xüsusi zənginləşdirilmiş qidalarda mövcuddur. Həkimlər həmçinin soya zülalının da qanda “pis” xolesterinin səviyyəsini azaltmağa kömək etdiyini bildirirlər.