Bulyonun bulanıq alınması bir çox evdar qadının qarşılaşdığı mətbəx problemlərindən biridir. Foodinfo.az bildirir ki, xüsusilə soyuq ət yeməkləri, xaşıl və müxtəlif şorbaların hazırlanmasında şəffaf bulyon həm görünüş, həm də təqdimat baxımından mühüm əhəmiyyət daşıyır.

Mütəxəssislərin sözlərinə görə, bulanıqlıq əsasən bişirmə zamanı mayedə qalan xırda hissəciklərdən yaranır. Bu problemi aradan qaldırmaq üçün ən sadə vasitələrdən biri yumurta ağından istifadə etməkdir. Təxminən üç litr bulyon üçün iki yumurtanın ağı kifayət edir. Mənbənin məlumatına görə, yumurta ağı artıq hissəcikləri özünə çəkərək mayenin daha təmiz görünməsinə kömək edir.

Bunun üçün bulyon əvvəlcə bir qədər soyudulmalı, sonra yumurta ağı əlavə edilməlidir. Daha sonra qazan yenidən zəif odda qızdırılır və maye qaynama həddinə çatdırılır. Bu zaman yumurta ağı bulyondakı asılı qalan hissəcikləri toplayır. Sonda yaranan kütlə kəfkir vasitəsilə götürülür və bulyon daha şəffaf hala gəlir. Alternativ olaraq əzilmiş yumurta qabığından da istifadə etmək mümkündür. Bu sadə üsul bulyonun həm görünüşünü yaxşılaşdırır, həm də onun dad xüsusiyyətlərini qoruyub saxlayır.