Fred Hatçinson Onkoloji Tədqiqatlar Mərkəzindən (ABŞ) olan alimlər piylənmə ilə Altsheymer xəstəliyi arasında əlaqə olduğunu müəyyən ediblər. 

Foodinfo.az xəbər verir ki, tədqiqatın nəticələri "PLOS Biology" jurnalında dərc olunub.

Drozofil meyvə milçəyi üzərində aparılan təcrübədə həşəratın beyni tədqiq olunub. Əvvəlki araşdırmada komanda yüksək şəkərli pəhrizin milçəklərin periferik orqanlarında insulin dirəncinə səbəb olduğunu aşkarlayıb. İndi isə mütəxəssislərin diqqəti qlial hüceyrələrə yönəlib, çünki mikroqliya disfunksiyası sinir sisteminin degenerasiyasına səbəb olur.

Məlum olub ki, yüksək şəkərli pəhriz qlial hüceyrələrdə PI3k zülalının səviyyəsinin azalmasına səbəb olub, bu isə insulin dirəncindən qaynaqlanır. Bundan əlavə, insan mikroqliyasının analoqu olan hüceyrələrdə funksiyanın pozulduğunu göstərən Draper zülalının səviyyəsi aşağı olub.

Növbəti sınaqlar göstərib ki, PI3k səviyyəsinin süni şəkildə aşağı salınması həm insulin dirəncinə, həm də drozofillərin qlial hüceyrələrində Draper zülalının azalmasına səbəb olur.

Ən mühüm kəşf odur ki, qoxu neyronlarının zədələnməsindən sonra yüksək şəkərli pəhrizdə olan şəxslərdə mikroqliya analoqları hüceyrə tullantılarını xaric edə bilməyiblər, çünki onların Draper göstəriciləri aşağı olub. 

Beləliklə, çox miqdarda şəkər istehlak etmək qlial hüceyrələrdə insulin dirəncinə səbəb olur, onların hüceyrə tullantılarını təmizləmək qabiliyyətini zəiflədir. Tədqiqatın nəticələri neyrodegenerativ xəstəliklərin inkişafının qarşısının alınması üçün yeni üsulların əsasını təşkil edə bilər.