Yayda bürünc dəriyə sahib olmaq üçün uzun müddət günəş vannası qəbul etmək qısa müddətdə dəri yanıqlarına, uzun müddətdə isə dəri xərçənginə səbəb olur.
Foodinfo.az xəbər verir ki, D vitamininin ən yaxşı qaynağı olan günəş və yayda yer üzünə daha kəskin şəkildə gələn ultrabənövşəyi (UV) şüaların mənfi təsirləri bəzi sağlamlıq problemlərini də gətirib çıxarır.
Uzun müddət günəş altında qalmaq, xüsusən də şüaların daha dik olduğu iyul və avqust aylarında dəridə allergiya, qalıcı ləkə və çapıqlar, xüsusilə açıq dərili insanlarda dəridə birinci və hətta ikinci dərəcəli yanıqlara səbəb ola bilər.
Mütəxəssislər xəbərdarlıq edir ki, 30 dəqiqədən çox günəş altında qaldıqda günəşdən qoruyucu kremlərdən və eynəklərdən istifadə etmək lazımdır.
Günəş yanığının tipik əlaməti qızarmış dəridir. Bundan əlavə, dəri bir az şişmiş və qaşınmış ola bilər. Şiddətli yanıqlarda dəridə maye ilə dolu kabarcıklar da ola bilər. Şiddətli ağrı və ya şişkinlik varsa, həkimə müraciət etmək lazımdır.
Günəş yanığı vəziyyətində dərinin kifayət qədər soyudulması vacibdir. Dəriyə soyuq bir şey sürtmək ağrıları aradan qaldırır və iltihabın qarşısını alır.
Ancaq buz kubları kimi həddindən artıq soyuq şeylər müalicə üçün uyğun deyil. Soyuq suya batırılmış bir dəsmaldan istifadə etmək daha məqsədəuyğundur.
Soyuq kompres tətbiqi ən azı yarım saat və mümkünsə yanıq nahiyəsində ağrılar yox olana qədər davam etdirilməlidir. Bundan əlavə, bol maye qəbulu vacibdir, çünki günəş yanığı səbəbindən dəridən çox miqdarda maye itirilir.
Evdə günəş yanığı üçün xalq arasında tətbiq olunan yanmış dəriyə soyuq qatıq sürtmək yalnız soyuq olduğu üçün ağrıları yüngülləşdirə bilər, ancaq dəridə yanıq nəticəsində yaranan iltihablı vəziyyətə müalicəvi təsir göstərmir.
Süd məhsullarının tərkibindəki bakteriyalar infeksiyaya səbəb ola bildiyi üçün qatıq və pendir kimi qidaları dəriyə sürtməkdən çəkinmək lazımdır. Diş məcunu dəriyə sürtmək faydadan çox zərər verəcək bir tətbiq olduğu üçün heç vaxt edilməməsi lazım olan bir tətbiqdir.
• Həm UVA, həm də UVB dalğalarına qarşı geniş təsirli qoruyucu kremlərin olması çox vacibdir. Yalnız UVB şüalarının qarşısını alan qoruyucu kremlər dəridə günəş yanıqlarının qarşısını aldıqları üçün günəşdə uzun müddət qalmanıza imkan verəcək və zərərli UVA şüalarından qorumadıqları üçün xeyirdən çox zərər verəcəklər.
• Qoruma faktoru ən azı 30 (SPF 30) olan məhsul seçilməlidir.
• Yağlı dəriyə sahib olanlar gel, yağsız və su əsaslı məhsulları, quru dərisi olanlar isə krem əsaslı məhsulları seçə bilər. Bədənin qorunmasında sprey məhsulların istifadəsi daha praktik ola bilər. Suya davamlı məhsullar tərlədikdə və suda daha uzun müddət fəaliyyətlərini davam etdirə bilirlər.
• Günəşə çıxmadan 15-30 dəqiqə əvvəl qoruyucu krem çəkilməlidir.
• Qoruyucu hər iki saatdan bir yenidən tətbiq edilməlidir.
• Günəşdən qoruyucu krem quruduqdan sonra yenidən çəkilməlidir.
• Ən əsası günəşdən qoruyucu kremlər bizə lazımsız güvən verməməli və günəşdə qalma müddətimizi artırmamalıdır.
Bədənimizin kifayət qədər D vitamini əldə etməsi üçün günorta saatlarında bəzi qol və ya ayaq nahiyələrimizin 15-20 dəqiqə günəş işığı alması kifayətdir.
