Altıgünlük iş qrafiki insan orqanizmini həm fiziki, həm də emosional cəhətdən yora bilər. Foodinfo.az xəbər verir ki, psixoterapevt İrina Kraškina uzun iş həftəsini daha rahat keçirmək üçün enerji prinsipinə əsaslanan iş planı təklif edib.

Mütəxəssis “şəxsi güc ehtiyatlarını düzgün idarə etməyin” uzunmüddətli məhsuldarlığın açarı olduğunu vurğulayıb. Onun sözlərinə görə, həftə boyu tapşırıqların intensivliyi tədricən azaldılmalıdır ki, bədən və beyin tükənməsin.

Kraškina belə bir ardıcıllıq təklif edir:
Bazar ertəsi–çərşənbə – aktivlik mərhələsidir. Enerji səviyyəsi bu günlərdə ən yüksək olur, buna görə mürəkkəb və iri həcmli işləri məhz bu dövrdə həll etmək məqsədəuyğundur.
Cümə axşamı – yavaşlama mərhələsi. Yeni layihələrə başlamaq əvəzinə, əvvəlki işləri yekunlaşdırmaq daha doğrudur.
Cümə – planlaşdırma mərhələsi. Ertəsi gün üçün aydın plan tərtib edilməlidir ki, şənbə günü işlərin həcmi və prioritetləri bəlli olsun.
Şənbə – minimal fəaliyyət günü. Bu zaman yalnız ən vacib tapşırıqları yerinə yetirmək, bədəni və beyni yormamaq tövsiyə olunur.
Bazar – tam bərpa mərhələsi. Psixoterapevtin sözlərinə görə, “bir neçə saatı ekranlardan, zənglərdən və iş mövzularından uzaqda keçirmək” enerjini yeniləməyə və stressi azaltmağa kömək edir.

Kraškina əlavə edib ki, bu strategiyanın məqsədi “mükəmməl işləmək” deyil, özünü qorumaq və balansı saxlamaqdır. Onun fikrincə, müasir dövrdə özünə qayğı artıq dəbdəbə deyil, peşəkar dayanıqlığın vacib hissəsidir.