39 yaşlı amerikalı Coui Çestnat hər il ABŞ-ın Müstəqillik Günündə keçirilən hot-doq yemək yarışmasına növbəti dəfə qatılaraq cəmi 10 dəqiqəyə 62 hot-doq yeyib və artıq 16-cı dəfə qalib olub. Lakin 2023-cü ildə o, bir il öncəki rekordunu keçə bilməyib: ötən il Çestnat 76 hot-doq yemişdi.
Foodinfo.az xəbər verir ki, Coui CNN-ə müsahibəsində yarışmadan öncə və sonra etdikləri barədə danışıb.
O, yaxşı qonaqlıqdan sonra hər kəsin hiss etdiyi ağırlığı bir neçə dəfə daha pis formada hiss etdiyini bildirib.
"İnsanlar mənə deyirlər ki, yarışmadan sonra mən hot-doq iyi verirəm. Özüm bu qoxunu hiss etmirəm, amma tərim xüsusilə yapışqan və yağlı olur. Sevgilim də məndən həmişəkindən fərqli qoxu gəldiyini deyir", - deyə Coui etiraf edib.
Yarışdan sonra o, adətən otelə qayıdır, su içir və yuxuya gedir, çünki bu qədər qida yemək çox güc tələb edir. Bundan sonra Çestnat uzun müddət tualetdə qalır.
Yarışdan əvvəl isə Coui yarışa tamamilə boş mədə ilə girə bilməsi üçün ciddi pəhriz saxlayır. İki gün ərzində o, yalnız limon suyu ilə su içir.
"Bədənim bilir ki, tezliklə böyük miqdarda qida həzm etməli olacaq, ona görə də bunu asanlaşdırmaq üçün əlimdən gələni edirəm", - deyə Çestnat danışıb.
Bu həcmdə yeməyi həzm etmək üçün adətən 9-10 saat vaxt tələb olunur, lakin detoks üsulu Couiyə prosesi sürətləndirməyə kömək edir.
Belə bir yük orqanizm üçün əlavə stress olsa da, son illərdə hot-doq yemək yarışmasında əfsanəvi simaya çevrilən Çestnat bu işdən əl çəkmək fikrində deyil. Üstəlik, bütün bunlardan sonra da o hot-doqdan iyrənmədiyini, hətta sevdiyini etiraf edir vəbədəni tab gətirənədək ənənəvi yarışmada iştirak edəcəyini bildirir.
Qeyd edək ki, "Nathan's Famous Hot Dog Eating Contest" adlı məşhur hot-doq yemək müsabiqəsi hər il ABŞ-ın Müstəqillik Günündə Nyu Yorkda keçirilir. İlk yarışma 1916-cı ildə baş tutub. Həmin il irlandiyalı Cim Mallen mərcə girərək 12 dəqiqə ərzində 13 sosiska yeyib. Müsabiqə yalnız İkinci Dünya Müharibəsi dövründə keçirilməyib. Hər kateqoriya üzrə qalib 10 000, ikinci və üçüncü yerləri tutanlar isə müvafiq olaraq 5 000 və 2 500 dollar alırlar.
Natəvan
