Şəkərin sağlamlığa təsiri mövzusu uzun illərdir müzakirə olunur. Foodinfo.az “Championat.ru” saytına istinadla xəbər verir ki, qidalanma, endokrinologiya və nevrologiya üzrə mütəxəssislər şirniyyatın orqanizmə zərər və faydalarını təhlil ediblər.

Qidalanma üzrə mütəxəssis Lana Leonovanın sözlərinə görə, maye şəkərlər — xüsusilə qazlı içkilər və şirin çaylar — doyma siqnalını zəiflədir və əlavə kalori qəbulunu artırır. Bu isə piylənmə və tip 2 diabet riskini yüksəldir. Endokrinoloq Viktoriya Rusina əlavə edib ki, qlükozanın tez-tez qəbulu insulin müqavimətinə səbəb olur, fruktozanın isə qaraciyərdə piy yığılmasına yol açdığı sübut olunub.

Terapevt Nadejda Kudinanın sözlərinə görə, şəkərin həddindən artıq istifadəsi ürək-damar sisteminə birbaşa təsir göstərir: “Şirin qidaların çoxluğu arterial hipertenziya və ateroskleroz riskini artırır, hətta bədən çəkisi normada olsa belə”.

Ümumdünya Səhiyyə Təşkilatı gündəlik sərbəst şəkər qəbulunun ümumi kalori tələbatının 10 faizindən çox olmamasını tövsiyə edir, Amerika Kardiologiya Assosiasiyası isə qadınlar üçün gündə maksimum 25 qram, kişilər üçün isə 36 qram həddini məsləhət görür. Mütəxəssislər bildirirlər ki, şəkəri azaltmağın ən effektiv yolu içkilərdəki gizli şəkərdən imtina etməkdir.