Aparılan laboratoriya araşdırmaları göstərib ki, dondurucuda saxlanılan məhsullar keyfiyyətini və faydasını çoxlarının düşündüyündən daha tez itirir. Mütəxəssislərin fikrincə, qida uzun müddət dondurulmuş vəziyyətdə qalsa belə, bu onun tam təhlükəsiz və faydalı olduğu anlamına gəlmir.
Bir çox insan ət və balığı “lazım olar” düşüncəsi ilə illərlə dondurucuda saxlayır. Lakin ixtisaslaşmış laboratoriyaların nəticələrinə görə, normadan artıq saxlanılan məhsullar dadını, teksturasını və faydalı maddələrinin 60 faizə qədərini itirə bilər. Maraqlıdır ki, bu dəyişikliklər məhsul xarab görünməsə belə baş verir.
—18 dərəcə Selsi və daha aşağı temperaturda, keyfiyyət itkisi olmadan saxlanıla bilən real müddətlər belədir: mal və donuz əti parçaları üçün maksimum 8–9 ay, bütöv toyuq üçün 9 aya qədər, qiymə üçün cəmi 3–4 ay. Yağlı balıqlar, məsələn losos, 2–3 ay ərzində istifadə olunmalıdır, ağ ətli balıqlar isə maksimum 6 ay saxlanıla bilər. Göyərti təxminən 4 ay, giləmeyvələr isə temperatur sabit olduqda 1 ilə qədər öz xüsusiyyətlərini qoruya bilir.
Mütəxəssislər bildirirlər ki, qalın buz qatı, ətin bozarması və balığın əridildikdən sonra yumşaq, dağınıq quruluş alması keyfiyyətin artıq zədələndiyini göstərən əsas əlamətlərdir. Ən çox edilən səhvlər məhsulları porsiyalara bölmədən, uyğun qablaşdırma olmadan dondurmaq və dondurucunu tez-tez açaraq temperatur rejimini pozmaqdır.
Ekspertlər hər bir paketin üzərinə dondurulma tarixinin yazılmasını, məhsulların porsiyalara ayrılmasını və əvvəlcə köhnə ehtiyatların istifadə edilməsini tövsiyə edirlər. Bu yanaşma dondurucunun “qida anbarı”na deyil, həqiqətən faydalı və qənaətcil mətbəx köməkçisinə çevrilməsinə imkan verir.
