Badam uzun illərdir sağlam qida kimi tanınsa da, son araşdırma onun daha bir mühüm faydasını üzə çıxarıb. Aparılan tədqiqat göstərir ki, bu qozun gündəlik qəbulu orqanizmdə iltihab əlamətlərinin azalmasına kömək edə bilər. Foodinfo.az aif.ru-ya istinadla xəbər verir ki, bu nəticə ABŞ alimlərinin apardığı araşdırmada ortaya çıxıb və tədqiqatın nəticələri elmi nəşrdə dərc olunub.
Araşdırmada piylənmə problemi olan 69 yetkin insan iştirak edib. Tədqiqat iştirakçıları iki qrupa bölünüb və onların gündəlik qidalanma rejimi və həyat tərzi dəyişdirilməyib. Bir qrup iştirakçı hər gün təxminən 57 qram badam qəbul edib, digər qrup isə eyni enerji dəyərinə malik peçenye ilə qəlyanaltı edib.
Müşahidə altı həftə davam edib. Bu müddət başa çatdıqdan sonra alimlər iştirakçıların sağlamlıq göstəricilərini müqayisə ediblər. Nəticələr göstərib ki, mütəmadi olaraq badam yeyən qrupda orqanizmdə iltihabla əlaqəli bəzi maddələrin səviyyəsi nəzərəçarpacaq dərəcədə azalıb.
Mütəxəssislər bildirirlər ki, bu maddələr insan orqanizmində xroniki iltihab proseslərinin yaranması ilə əlaqəlidir. Belə vəziyyət isə zamanla şəkərli diabetin inkişaf riskini artırır, həmçinin ürək və damar xəstəliklərinin yaranmasına zəmin yarada bilər.
Alimlərin fikrincə, əldə olunan nəticə badamın zəngin tərkibi ilə bağlıdır. Bu qoz növündə qida lifləri, faydalı yağlar, E vitamini və orqanizm üçün vacib olan müxtəlif mineral maddələr mövcuddur. Bu maddələr birlikdə orqanizmdə müdafiə mexanizmlərinin güclənməsinə kömək edir.
Tədqiqat müəllifləri hesab edirlər ki, badamın gündəlik qida rasionuna daxil edilməsi xüsusilə artıq çəki problemi olan insanlar üçün faydalı ola bilər. Onların sözlərinə görə, bu qoz növü iltihab proseslərinin zəifləməsinə və ümumi sağlamlığın qorunmasına müsbət təsir göstərə bilər.
Mütəxəssislər eyni zamanda qeyd edirlər ki, qoz-fındıq məhsulları ölçülü miqdarda qəbul edilməlidir. Düzgün və balanslı qidalanma ilə birlikdə istifadə edildikdə badam həm ürək-damar sisteminin qorunmasına, həm də orqanizmin ümumi vəziyyətinin yaxşılaşmasına kömək edə bilər.
