Gündəlik qidalanmada nahar mühüm rol oynasa da, bir çox insan bu yeməyə kifayət qədər diqqət ayırmır. Sürətli həyat tərzi səbəbindən bəziləri naharı ötürür, bəziləri isə tələsik və qeyri-sağlam seçimlər edir. Foodinfo.az BB.LV saytına istinadla xəbər verir ki, bu cür vərdişlər zamanla sağlamlıq problemlərinə, o cümlədən artıq çəki və maddələr mübadiləsi pozğunluqlarına səbəb ola bilər.

Mütəxəssislər bildirir ki, ən böyük səhvlərdən biri naharı buraxmaqdır. Bu, gün ərzində enerji çatışmazlığı yaradır və axşam saatlarında həddindən artıq yeməyə səbəb olur. Digər geniş yayılmış yanlış seçim isə sendviçlərdir. Ağ çörək, kolbasa, pendir və yağlı souslarla hazırlanan bu qidalar yüksək kalorili olsa da, uzunmüddətli toxluq hissi vermir.

Bundan əlavə, ayaqüstə və ya iş başında yemək də düzgün deyil. Qida diqqətlə və tələsmədən qəbul edilməlidir ki, orqanizm doyma siqnallarını vaxtında qəbul etsin. Rasionda tərəvəzlərin az olması da ciddi səhv sayılır. Sadə karbohidratlarla zəngin qidalar qan şəkərinin sürətlə dəyişməsinə səbəb olur və orqanizm üçün kifayət qədər fayda vermir.

Salat seçimi düzgün olsa da, onun üzərinə əlavə edilən souslar və əlavələr diqqətlə seçilməlidir. Yağlı souslar, bekon və qızardılmış çörək parçaları salatın faydasını azaldır. Əvəzində mərcimək, yumurta və ya bitki mənşəli zülallar daha sağlam seçim hesab olunur. Mütəxəssislər naharın balanslı və planlı şəkildə qəbul edilməsini tövsiyə edirlər.