Gicitkən çox vaxt faydalı bitki kimi tanınsa da, bəzi hallarda onun istifadəsi sağlamlıq üçün ciddi risklər yarada bilər. Xalq təbabətində geniş istifadə olunan bu bitkinin təsiri hər kəs üçün eyni deyil və müəyyən xəstəliklər zamanı ondan uzaq durmaq tövsiyə olunur. Foodinfo.az “Çempionat” portalına istinadla xəbər verir ki, qastroenteroloq Vladimir Loginov gicitkənin kimlər üçün təhlükəli ola biləcəyini açıqlayıb.

Mütəxəssis bildirir ki, gicitkən yarpaqları K vitamini, xlorofil, dəmir və digər faydalı maddələrlə zəngindir, bu səbəbdən qanı dayandırıcı, iltihabəleyhinə və ödqovucu təsir göstərə bilər. O, həmçinin hemoglobinin artmasına, bağırsaq fəaliyyətinin yaxşılaşmasına və qlükoza səviyyəsinin tənzimlənməsinə kömək edə bilər. Buna baxmayaraq, bu təsirlər hər zaman müsbət nəticə vermir və bəzi hallarda əks təsirlərlə müşayiət olunur.

Həkimin sözlərinə görə, gicitkən qanı qatılaşdırmaq xüsusiyyətinə malikdir və bu, tromboz, tromboflebit və ürək-damar xəstəlikləri olan şəxslər üçün təhlükə yarada bilər. Eyni zamanda, onun dəmləməsi qan təzyiqini artıra, mədədə spazm və yanma hissi yarada bilər. Bitki həmçinin uşaqlıq tonusunu artırdığı üçün hamilə qadınlarda düşmə riskini yüksəldir.

Ekspert əlavə edir ki, gicitkənin tərkibində olan maddələr allergik reaksiyalara da səbəb ola bilər. Bu səbəbdən hipertoniya, trombofiliya, tromblu varikoz, infarktdan sonrakı dövr, hamiləlik və ağır böyrək xəstəlikləri olan şəxslərə bu bitkidən istifadə etmək qəti şəkildə tövsiyə olunmur. Mütəxəssislər qeyd edirlər ki, təbii məhsulların belə nəzarətsiz istifadəsi sağlamlıq üçün riskli ola bilər və hər zaman fərdi xüsusiyyətlər nəzərə alınmalıdır.