Qulançarın dadını və xırtıldayan teksturasını qorumaq üçün onu düzgün bişirmək vacibdir. Foodinfo.az bildirir ki, tanınmış aşpaz Anton Koçura bu tərəvəzi bişirərkən yağlı inqrediyentlərdən istifadə etməyi tövsiyə edir. Onun sözlərinə görə, zeytun yağı, kərə yağı və ya trüf yağı ilə yanaşı, yumurta sarısı və sərt pendirlər – Parmesan və Pecorino qulançarın dadını zənginləşdirə bilər.
Bişirməzdən əvvəl qulançarın sərt alt hissəsi 45 dərəcə bucaq altında kəsilir və qabıqları yüngülcə soyulur. Aşpaz bildirib ki, gənc tumurcuqları çiy halda yemək mümkündür. Bu halda, onları sadəcə yuyub üzərinə zeytun yağı, limon suyu və ya duz əlavə etmək kifayətdir. Belə hazırlanmış qulançar salatlara əlavə etmək üçün çox uyğundur.
Ən çox istifadə edilən üsullardan biri ağartmadır. Qulançar qısa müddətə qaynar suya batırılıb sonra soyuq su ilə şoklanır. Bu üsul xırtıldayanlığını qorumağa kömək edir. Orta tumurcuqlar 45 saniyə, incə tumurcuqlar isə 30 saniyə ağardılır. Ağardılmış qulançar balıq yeməklərinə garnitür kimi verilir və yağda azca qızardıla da bilər.
Digər məşhur üsul isə onu açıq odda və ya qrildə bol yağla bişirməkdir. Aşpazın fikrincə, bu zaman qulançar dumanlı bir ətir alır. Amma belə bişirməzdən əvvəl onun mütləq ağardılması vacibdir.
Qulançar klassik olaraq qaynadılmış yumurta ilə, eləcə də vetçina, stracciatella, treska ciyəri, qırmızı və qara kürü ilə yaxşı uyğunlaşır. Sarımsaq, limon suyu, zəncəfil və qara bibər kimi ədviyyatlar qulançarın dadını daha da maraqlı edir.
Aşpazın fikrincə, qulançar həm salatlarda, həm də ət və balıq yeməklərində ideal garnitür rolunu oynayır. O, xüsusilə ərinmiş yağda hazırlanmış qulançarın hər növ sousla uyumlu olduğunu qeyd edib.
