Səhər yeməyinin günün ən vacib qidalarından biri olduğu uzun illərdir mütəxəssislər tərəfindən vurğulanır. Son araşdırmalar göstərir ki, səhər yeməyini mütəmadi olaraq gecikdirmək orqanizmdə bir sıra dəyişikliklərə səbəb ola bilər. Foodinfo.az Healthline saytına istinadla xəbər verir ki, səhər yeməyinin gec qəbul edilməsi qan şəkərinin balansına və maddələr mübadiləsinin sürətinə təsir göstərə bilər.

Mütəxəssislərin sözlərinə görə, uzun müddət ac qalmaq gün ərzində daha çox kalori qəbul etməyə səbəb olur. Bu isə çəki artımı riskini yüksəldə bilər. Araşdırmalar göstərir ki, səhər yeməyini buraxan və ya gecikdirən insanlarda insulin həssaslığının azalması ehtimalı daha yüksəkdir. Bundan əlavə, bəzi şəxslərdə diqqət və konsentrasiya problemləri yarana bilər.

ABŞ-lı dietoloq Lisa Young bildirib ki, səhər saatlarında qəbul edilən balanslı qida orqanizmin enerji ehtiyatlarını bərpa edir və gün ərzində iş qabiliyyətini artırır. Onun sözlərinə görə, zülal, lif və faydalı yağlarla zəngin səhər yeməyi daha uzun müddət toxluq hissi yaradır. Mütəxəssis səhər yeməyinin oyandıqdan sonra ilk iki saat ərzində qəbul edilməsini tövsiyə edir. Bu vərdiş həm metabolizmin normal işləməsinə, həm də ümumi sağlamlığın qorunmasına dəstək verir.