Brokkolinin qida dəyərini maksimum səviyyədə qorumaq üçün onun düzgün hazırlanması olduqca vacibdir. Foodinfo.az xəbər verir ki, Sports.kz-in RБК-Ukrayna-ya istinadən yaydığı məlumata görə, bu tərəvəzin ən faydalı bişirmə üsulu xüsusi araşdırmalarla müəyyən edilib.
Verywell Health saytının paylaşdığı məlumatlara görə, doğru bişirmə prosesi brokkolidəki vitaminlərin və təbii antioksidantların daha çox saxlanmasına imkan verir. Xüsusilə “Journal of Agricultural and Food Chemistry” jurnalında dərc olunan araşdırma göstərib ki, brokkolinin doğranması və qısa müddət ərzində yüngül qızardılması onun tərkibindəki sulforafan adlı güclü antioksidantın miqdarını artırır. Sulforafan kələmgil bitkilərinə xas olan təbii birləşmədir və orqanizmdə antioksidant istehsalını gücləndirməsi ilə tanınır.
Tədqiqatçılar bildirir ki, brokkolini kiçik çiçəklərə ayırıb təxminən 90 dəqiqə gözlətmək və sonra yüngülcə qızartmaq sulforafanın ən yüksək səviyyədə qalmasına şərait yaradır. Bunun səbəbi tərəvəzin doğrandığı anda aktivləşən mirazinaza fermentidir. Bu ferment glukorafanin maddəsini sulforafana çevirir və bişirmədən əvvəl yaranan bu proses qidalılığın daha yaxşı qorunmasına kömək edir. Uzunmüddətli bişirmə isə, əksinə, brokkolidəki qida maddələrinin, o cümlədən sulforafanın azalmasına səbəb olur.
Araşdırma mikrodalğalı sobada və ya buxarda bişirmə kimi digər üsulları tam şəkildə nəzərə almasada, ümumi nəticələr göstərir ki, brokkolini qısa müddətdə və az istiliklə hazırlamaq onun qida tərkibini xeyli yaxşı qoruyur.
Brokkolinin tərkibinin zənginliyi də diqqətəlayiqdir. Bu tərəvəz C, K və A vitaminləri, həmçinin kalium, maqnezium, kalsium və dəmir kimi minerallarla boldur. Yüksək lif tərkibi həzm sistemini dəstəkləyir və orqanizmi uzun müddət tox saxlayır. Sulforafan, lutein və zeaksantin kimi antioksidantlar isə brokkolini sağlam qidalanmada mühüm məhsula çevirir.
Hansı üsulla bişirilməsindən asılı olmayaraq, brokkoli aşağı kalorili, liflə zəngin və qida dəyəri yüksək olan tərəvəz olaraq sağlam qidalanmanın dəyərli hissəsi sayılır.
